शिव शर्मा, टेक्सास
सात समुन्द्रपारी रहेपनि नेपालीले आफनो चाडपर्व भने भूल्न सक्दैनन् । झनै दशैं र तिहार जस्तो चार्ड प्रवासमा पनि धुमघामले मनाउछन् । दशैंमा टिका लगाउने, मिष्ठान्न भोजन गर्ने र साथीभाई तथा आफन्तहरुसंग एकआपसमा झमघट हुने गर्छन् । अरु बेला कामले फुर्सद नपाउने नेपालीहरु चाडपर्वलाई एक आपसमा भेटघाटको अवसर पनि बनाउँछन् । टिका लगाउने साईतमा भने कमैले लगाउने मौका पाउँछन् । नेपाल र यताको समयको तालिका मिल्दैन । काममा छु्ट्टी नपाउनेहरुले बिहान तथा बेलुकाको समय मिलाएर टिका लगाउँछन् । यहाँको टेक्सासको ड्यालसस्थित नेपाली मन्दिरमा आयोजना हुने सामुहिक टिका कार्यक्रममा पनि कतिपय सहभागी हुन्छन् । एउटा राज्यबाट अर्को राज्यमा गएर साथीभाई भेला भएर समेत नेपालीले दशै मनाउँछन् । अमेरिकाको टेक्सासमा रहेका नेपालीहरुको दशैं अनुभव उनीहरुकै शब्दमा–
कृष्ण लामिछाने, गोरखा
अध्यक्ष, नेपाली समाज टेक्सास
केही महिना अघि भाईको दुखद निधन भएकाले हाम्रो परिवारमा यो पाली दशै छैन । अघिल्लो वर्ष स्वदेशमै गएर दशैं मनाएको थिए । आफनो दशैं नभए पनि नेपाली समाजका दशैं सम्बन्धी विभिन्न गतिविधहरुमा संलग्न हुने गरेको छु । झण्डै १६ वर्षदेखि म टेक्सासमा रहेर नेपालीहरुलाई एकजुट बनाएर सामाजिक काममा पनि लागिरहेको छु । दशैका लागि गरिएको विषेश कार्यक्रममा टेक्सासका तीन सहरका मेयरलाई कार्यक्रममा बोलाएका छौं । विभिन्न दशैं सम्बन्धी सांगीतिक कार्यक्रम राखेका छौ । एउटा खुट्टाको भरमा नृत्य गर्ने रश्मी खरेलदेखि लोकगायक गायिका भगवान भण्डारी र शान्ति भण्डारीलाई डाकेका छौं । त्यस्तै हरि थापाले पञ्चेबाजा लगायतका धुनहरु पस्कनेछन् । घटस्थापना देखि दशमीसम्म विविध कार्यक्रमहरु आयोजना गरिएका छन् । यही सबै गतिविधिले यहाँ बस्ने नेपालीलाई दशैंको अनुभव खल्लो महसुस हुँदैन । यहाँ रहेको नेपाली मन्दिरमा पण्डितबाट टिका लगाउने कार्यक्रम समेत तय भएको छ । जहाँ रहेपनि आफनो धर्म संस्कार र संस्कृति बिर्सन हुदैन भन्ने मान्यताले चाडपर्व मनाउन नेपालीहरु विदेशमा भए पनि उद्धत छन् ।
उर्मिला पुरी, काठमाडौं
केही महिना अघि मात्रै हामी नेपालबाट टेक्सासको अस्टिन बसाई सरेका हौं ।यसपाली भने पहिलो पटक दशैं विदेशमा हुने भएको छ ।घटस्थापनाको दिनदेखि जमरा राखेर नवरात्रीको नियमति पूजा गरेकी छु । नेपालमा हुदाँ मठमन्दिर पुगेर पूजा गरिन्थयो । भगवतीको तस्विरको पनि यहाँ त व्यापार रहेछ । महंगो डलरमा किन्नु पर्ने रहेछ । नेपालमा अघिल्लो दिन दशैं सकिदा यतातिर भोलिपल्ट मनाउने गरिन्छ । तर जति नै राती भए पनि नेपालकै समय अनुसार दशै मनाउने योजना बनाएका छौ । ्स्काईप मार्फत उता र यताको टिकाको साईत जुराएर आर्शिवाद आदानप्रदान गर्ने सोच बनाएकी छु । पहिलो दशैं विदेशमा भएकाले देश र परिवारलाई मिस गर्नेछु । परिवारमा छोरा संयम उतै भएकाले उसको अभाव पनि हामीलाई हुनेछ । अरु सबै जना यतै भएकाले पहिलो प्रवासको दशैं रमाईलो संगै मनाउने योजना बनाएका छौ ।
राजेश लम्साल, इनरुवा
हामी अमेरिका आएको पनि तीन वर्ष पुरा भएर चार वर्ष लाग्यो । यहाँ आएर दुई दशैंहरु मनायौ । सबै घरपरिवार नातागोता नेपालतिर भएकाले दशैं आउँदा अल्ली खल्लो जस्तो लाग्छ । दुई छोराछोरी र हामी प्रवासमा भए पनि दशैं रमाईलो संगै मनाउछौ । दशैंको बेला चार दिन विदा लिन्छौ र एक आपसमा खुशीयाली गरेर मनाउछौ । नेपालमा जस्तै सिंगो खसी किनेर ल्याउछौ । यहाँ बजारमा नेपालमा जस्तै खसी बोका किन्न पाईन्छ । टिकाको दिन टेक्सासको ड्यालसमा रहेको नेपाली मन्दिरमा उमारिएको जमरा ल्याएर टिका लगाउछौ । सपरिवार टिका लगाएर मिष्ठान भोजन बनाएर खान्छौ । बाबुनानीलाई नया लुगा किनिदिन्छौ । उनीहरु नेपालमै जस्तै दशैं आउँदा रमाउछन् । यो पटकपनि दशै अघिल्लो वर्षमा जस्तै धुमधामसंग मनाउने योजना बनाईसकेका छौ । स्वदेशतिर आफन्तसंग सामाजिक संजालमा जोडिएर शुभकामना आदानप्रदान पनि गछौ । अरु समय काममै व्यस्त हुनु पर्ने भएकाले दशैंको मौका छोपेर सपरिवार नया ठाउँ घुम्न निस्कन्छौ ।
युगेन्द्रबहादुर शाही, काठमाडौं
आठ वर्ष भईसक्यो नेपाल छाडेर यता दशै मनाउन थालेको । परिवार सबै यतै भएकाले दशैं रमाईलो नै हुन्छ । घरपरिवार बाहेक अन्यत्र टिका लगाउन जादैनौ ।नेपालमा हुदाँ मामा घर र अरु आफन्तकोमा टिका लगाउन गईन्थयो । पिङ खेलेर उस्तै रमाईलो गरेको सम्झना आउछ । तर यता पिङको अनुभव भने गर्न पाईदैन ।दशैंको बेला साथीहरु भेला भएर तास पनि खेलिन्छ । लामो ड्राईभ पनि लायकको ठाउँ पुग्छौ । सुरुका वर्षहरुमा खासै चहलपहल नदेखिने दशैंमा नेपालीहरु संख्या बढेसंगै टिका र जमरा लगाएर सवारी साधनमा हिडेको प्रशस्तै देख्न पाईन्छ । यो दृश्यले नेपालतिर भएको दशैंको झझल्को पनि दिलाउछ । दशैंको अघिल्लो र टिकाको दिन हरेक वर्ष विदा लिन्छौ । गफगफ रमाईलो र खानपीन गदैं दशै बितेको पत्तै हुदैन । विदेशमा भए पनि सपरिवार बसेर टिका र जमरा लगाउँदा रमाईलो अनुभव हुन्छ ।
टोपा तिमिल्सेना सुर्खेत
नेपालमा हुँदा गाउँमा दशै मनाईन्थयो । सहरबाट झरेका साथीभाई जमघट भएर पिङ हालेर मज्जाले खेलिन्थयो । गाउँ डुलेर विजयदशमीको दिन मान्यजनबाट टिका र जमरा लगाएर आर्शिवाद थापिन्थयो । सात वर्ष यता अमेरिका आए यता त्यो क्षण सबै अतित भईसक्यो । यता आएको चार वर्ष दशैं मनाउने खासै वातावरण मिलेन । खासै चिनेजाने मान्यजन कोही भेटिएन । त्यो बेला घर गाउँको वातावरणको निकै सम्झना आउथ्यो । अहिले टेक्सासको लवकमा बसेदेखि टेक्सास टेक युनिभर्सिटीमा अध्ययन गर्ने हामी जस्ता विद्यार्थीलाई नेपाली व्यवसाय रञ्जना ओडेल र चन्द्र श्रेष्ठले आफनै घरमा डाकेर सामुहिक रुपमा टिका लगाईदिनुहुन्छ ।तीन वर्ष यता भने दशैंको अनुभव गर्न पाईएको छ । उहाँहरुको हातबाट टिका लगाउँदा घरपरिवारकै जस्तो अनुभव हुन्छ । अहिले हामी बस्ने लवकमा नेपालीहरुको जमघटले नेपालको गाउँमा मनाईएको दशैको झझल्को दिन्छ ।
ekantipur