दसैंमा नेपाली चेली साउदीको जेलमा
महेश श्रेष्ठ
साउदीः नेपाल फर्केर घरपरिवारका साथ दुःख-सुख दसैं मनाउला भन्दै महिनौदेखि नेपाली राजदूतावासको सेल्टरमा रहेका नेपाली चेली अहिले साउदी अरबको जेलमा रुँदै बस्न बाध्य छन् ।
कुवेतबाट साउदी अरब आइपुगेका र राजदूतावासको शरणमा पुगेका चेलीलाई दूतावासले उद्धार गर्न गरेको प्रयास असफल भएपछि उनीहरुको जेलको बास भएको हो । कुवेतमा घरेलु कामदारका रुपमा काम गर्न श्रमस्वीकृति दिलाएर नेपालबाट ल्याइएका र कुवेतमा नेपाली र अरबीयन दलालबाट बेचिएर साउदी अरबमा बधुँवा कामदार सरह बनाइएका उनीहरुको उद्धारका लागि दूतावासले आग्रह गरे पनि हुन सकेको छैन् ।
नेपाल सरकारको परराष्ट्र र श्रम तथा रोजगार मन्त्रालय, वैदेशिक रोजगार विभाग र वैदेशिक रोजगार कामदार कल्याण कोषलगायतमा पटकपटक रिर्पोट पठाएर र सहयोगकालागि अनुरोध गरे पनि नेपाली चेलीको उद्धार हुन सकेको छैन ।
कुवेतबाट पर्यटक भिसामा साउदी अरब भित्र्याइएका उनीहरुलाई गैरकानुनी रुपमा बसोबास गरेको आरोपमा साउदी सरकारले तोकेको जरिवाना तिर्न नसकेपछि जेल बस्नु पर्ने भएको हो ।
कार्यबाहक राजदूत आनन्द शर्माका अनुसार कुवेतबाट ल्याइएका नेपाली चेलीहरुले १५ हजार रियाल (४ लाख २७हजार रुपैयाँ) सम्म गैरकानुनी बसोबास वापतको जरिवाना तिर्नु पर्ने हुन्छ । त्यो जरिवाना मिनाह गरेर नेपाल फर्कन एक्जिट भिसा दिलाउन तीन महिना अघिदेखि दूतावासले साउदी सरकारसंग अनुरोध गरिराखेको छ । तर, दूतावासको प्रयास असफल भएपछि दूतावासको सेल्टरमा रहेका उनीहरुलाई एक महिला जेलमा पठाइएको छ ।
अब उनीहरुलाई साउदी सरकारको निर्णय अनुसार जेलबाटै नेपाल पठाउने व्यवस्था हुने छ । साउदी अरबमा बिक्री गरिएका कतिपयलाई मालिकले अन्यत्र घर र स्थानमा काम गर्न लगाएर कमाई खाएर श्रमशोषण पनि गर्ने गर्दछन् । नेपाली राहदानी खोसी बधँुवा कामदार बनाइएका उनीहरुलाई साउदी–कुवेत सीमाबाट ६ महिनाको पर्यटक भिसामा साउदी भित्र्याइएको छ ।
उनीहरुलाई पुनःकुवेत नपठाई गैरकानुनी रुपमा घरभित्रै लुकाएर कामगर्न लगाइन्छ र तलब समेत नदिई काममा खटाएर भौतिक तथा मानसिक यातना मात्र होइन यौन शोषण समेत हुने गरेको खुलासा भएको छ ।
भागेर दूतावासको शरणमा आउने दुई वर्षदेखि १० वर्षबढी साउदी अरबमा काम गरेका महिला छन् । पछिल्लो जानकारी अनुसार दुतावासबाट पठाइएका ९ र यसअघि नै त्यहाँ रहेका ८ गरेर १७ जना नेपाली चेली नेपाल फर्कने प्रतिक्षामा महिला जेलमा छन् ।
annapurnapost