सुदीप कैनी, आँबुखैरनी (तनहुँ)
आश्विन २०, २०७३- पहिरोले १० घण्टाभन्दा बढी समय अवरुद्ध भएर खुलेको पृथ्वीराजमार्गको मुग्लिन–आँबुखैरनी खण्ड बिहीबार पनि एकतर्फी रुपमा मात्रै सञ्चालन भइरहेको छ ।
एकतर्फी मात्रै गाडी सञ्चालन हुँदा दसैं मनाउन घर फर्कंदै गरेका यात्रु जाममा फस्ने गरेका छन् । डोजरले पहिरो पन्छाउने काम रोकेर दुवै तर्फका गाडीलाई आधाआधा घण्टामा वारपार गराएको इलाका प्रहरी कार्यालयका निरीक्षक रमेश श्रेष्ठले जानकारी दिए ।
राति ९ बजेबाट सडक एकतर्फी खुलेको हो । बुधबार दिनभर जाममा परेका गाडी बिहानसम्म पहिरो कटेर गन्तव्यतर्फ हिँडेका थिए । ‘रातभर पहिरोको जाममा बसियो’, यात्रु अमर अधिकारीले भने ।
अघिल्लो दिनका गाडीहरुले पहिरो पार गरेपछि गाडीको चाप घटेको श्रेष्ठले बताए । ‘अहिले खासै लामो जाम छैन’, उनले भने, ‘ सडक एकतर्फी नै छ डोजर लगाउने काम भइरहेको छ ।’ दुईवटा डोजरले दुईतर्फी नै बाटो खुलाउन काम गरिरहेको उनले बताए । ‘केहि छिन डोजर लगाएर एकछिन गाडी पास गर्ने गरेका छौं, गाडी पनि पास गराउनु पर्दा काममा डिस्टर्ब भएको छ’, उनले भने ।
पानी नपरे साँझसम्म दुईतर्फी सडक सञ्चालन हुने अनुमान गरिएको छ । पहिरो स्थल वरपर भने बिहानैदेखि सामान्य वर्षा भइरहेको छ । घाम लागेको छैन ।
बुधबार बिहान ८ बजे आँबुखैरनी बजारनजिकै ऐना पहरोमा पहिरो गएर राजमार्ग अवरुद्ध भएको हो । दिनभर पहिरो पन्छाउने काम गरेपछि साँझ एकतर्फी गाडी खुलेको थियो ।
पहिरोका कारण दसैंका लागि घर हिँडेका सर्वसाधरण, बिरामी बोकेका एम्बुलेन्स, पर्यटक मारमा परेका छन् ।
ekantipur
