बिहान ११ बजेदेखि सम्पर्कविहिन भएका सर्वाेच्चका तामेल्दार शम्भ् खत्री (हातमा पत्र लिएका) । फाइल तस्बिर : कान्तिपुर
आश्विन २०, २०७३- अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीको घरमा आज फेरि म्याद (सूचना) टाँस्न सर्वोच्च अदालतका तामेल्दारसहितको टोली जाने भनिए पनि तामेल्दार शम्भु खत्री सम्पर्कविहिन भएका छन् । अदालत स्राेतका अनुसार बिहान ११ बजे तिर वडा नम्बर १० काे कार्यालयमा नै भेट्ने जानकारी गराएका उनी अहिले सम्पर्कविहिन भएका हुन् ।
‘उहाँले ११ बजे तिर भेटेर म्याद टाँस गर्न जाने भनि फाेनमा भन्नु भएकाे थियाे । अहिले उहाँकाे फाेन अफ छ,’ अदालत स्राेतले भन्याे, ‘उहाँले केही खबर पनि गर्नुभएकाे छैन । पत्रहरु सबै उहाँसँग नै छ ।’
हिजो बुधबार पनि म्याद टाँस गर्न टोली गए पनि त्यहाँ भाडामा बस्नेहरु मात्र भएकाले त्यसै फर्किएको थियो ।
हिजो भाडामा बस्नेहरु मात्रै रहेकाले म्याद टाँस्न नमिल्ने भनि फर्किएको तामेल्दारको टोली आज फेरि सूचना टाँस गर्न जाने भएका हुन् । हिजो टाँस्न नमिल्ने भनेर फर्किए पनि आज के आधारमा टाँस्न मिलेको हो भन्ने खुलाइएको छैन । म्याद टाँस गर्न टोली सर्वोच्चबाट हिँड्ने तरखरमा रहेकाे बेला तामेल्दार नै सम्पर्कविहिन भएपछि सबैजना अन्याैलमा परेका छन् ।
अख्तियार प्रमुखको नियुक्ति पुनरावलोकन गर्ने सर्वोच्चको निर्णयपछि प्रमुख आयुक्त कार्कीेले बहसको बारम्बार म्याद बुझ्न नमानेपछि उनको घरमा सूचना टाँस्ने निर्णयमा सर्वोच्च पुगेको हो ।
हिजो सूचना टाँस्नका लागि मुचुल्का उठाउन अदालतको टोली वडा नम्बर १० स्थित वडा कार्यालय पुग्नु अगावै कार्यालयबाट बाहिरिएकी वडा सचिव सरिता राई आज भने ढिला गरी कार्यालयमा उपस्थित छिन् । वडा प्रशासनमा काम गर्ने एक अधिकारीले उनी महानगरपालिकाको तालिमका लागि बाहिर रहेकाे बताएका थिए । तर उनी केही बेर अघि कार्यालयमा अाएकी हुन् ।
बुधबार म्याद टाँस्न अख्तियार प्रमुखकाे घर पुगेका सर्वाेच्चका तामेल्दार शम्भु खत्री । तस्बिर : अंगद ढकाल
वडा सचिवको रोहवरमा मुचुल्का उठाएर सूचना टाँसेपछि उक्त म्याद कार्कीले नै बुझेसरह हुने कानुनी व्यवस्था छ । मध्य दिनसम्म वडा सचिवको पर्खाइमा रहेको सर्वोच्च टोली त्यसपछि म्याद टाँस्न कार्कीकै घर पुगेको थियो । कार्कीको घर भाडामा लगाइएको र परिवारका सदस्य कोही पनि नबस्ने जानकारी पाएपछि टोली म्याद नटाँसी फर्केको हो ।
प्रमुख आयुक्त कार्कीको नियुक्ति कानुनसम्मत नभएको भन्दै अधिवक्ता ओमप्रकाश अर्यालले २०७० वैशाख २९ मा रिट निवेदन दायर गरेका थिए । सर्वोच्चले २०७१ असोज ८ मा खारेज गरेको उक्त रिट पुनरावलोकन हुने भएपछि पछिल्लो कदम चालिएको हो ।
सर्वोच्चको तामेली शाखाले दुवै पक्षलाई म्यादको पत्र पठाएको थियो । अधिवक्ता अर्यालले पत्र बुझिसकेका छन् भने कार्कीले बुझ्न अस्वीकार गरिरहेका छन् । पुनरावलोकनको निर्णयपछि सर्वोच्चले सामान्य प्रशासन मन्त्रालय र प्रधानमन्त्री कार्यालयबाट नियुक्तिसम्बन्धी फाइल झिकाइसकेको छ ।
मुलुकी ऐन अदालती बन्दोबस्तीको ११० नम्बरमा म्याद सूचना तामेल गर्न पठाउने विधि उल्लेख छ । यस्तो सूचना सकेसम्म सम्बद्ध व्यक्तिलाई नै बुझाउनुपर्नेछ । व्यक्ति नभेटिए उसको घरका सदस्य वा उनीहरू पनि नभेटिए सबैले देख्ने गरी घर वा डेराको ढोकामा सूचना टाँस गर्न सकिन्छ । तर यसरी म्याद टाँस्दा सम्बन्धित वडा कार्यालयका सचिवको उपस्थिति अनिवार्य हुन्छ । यसरी पनि सूचना टाँस्न नसकिए अदालतले राष्ट्रिय पत्रपत्रिका वा टेलिभिजनमा सूचना प्रसारण गरेर म्याद बुझाउन सक्नेछ ।
ekantipur
