शिव उप्रेती

गोरखाः साझा यातायात प्रालिले सञ्चालन गरेको साझा बस आइतबार गोरखा आइपुगेको छ । बिहान ८ बजे कलंकीबाट गोरखाका लागि छुटेको बा ३ ख २२२१ नम्बरको साझा बस दिउँसो तीन बजे गोरखा आइपुगेको हो ।

सरकारको आग्रहमा साझा यातायातले केही दिनअघि गोरखा र बाग्लुङका लागि साझाको बस चलाउने निर्णय गरेको थियो । गोरखाबाट काठमाडौंका लागि दैनिक एक र काठमाडौंबाट गोरखाका लागि दैनिक एक बस छुटाउने निर्णय अनुसार पहिलो पटक आइतबार साझाको बस गोरखा आएको हो ।

दसैंको मुखमा राजधानीबाट घर फर्कने यात्रुको चाप बढेका बेला साझाको बस संचालनमा आएपछि यात्रुलाई केही सुविधा भएको स्थानीयबासीको भनाइ छ ।

आइतबार पहिलो पटक जौवारी घर भएका चालक टेकबहादुर श्रेष्ठले साझाको बस गोरखा ल्याएका हुन् । एक दसक बन्द रहेको साझा यातायात फेरि सुरु भएपछि गोरखाबासी खुशी भएका छन् ।

‘सीटमा बसेर आनन्दले आइयो’ पहिलो यात्रा गर्न पाउँदा खुशी हुदै नारेश्वरकी इरादा कोइरालालले भने, ‘भाडा पनि सस्तो, सिट पनि राम्रो । कोचाकोच गरेर बस्नु पनि नपर्ने ।’ दुई सय ७५ रुपैयाँ भाडा तिरेको उनले बताइन् ।

गोरखा–काठमाडौँको एक सय ४२ किलोमिटर यात्रा गरेको भाडा माइक्रो बसले तीन सय ६३ रुपियाँ लिदै आएका छन् भने अरु यातायातका ठूला बसले दुई सय ८० लिँदै लिएका छन् ।

साझाको बसलाई धादिङ, चितवनको मुग्लिन, तनहुँको आँबुखैरेनीमा स्थानीयबासीले स्वागत गरेका चालक श्रेष्ठले बताए । ‘साझाले अरु गाडीहरु पनि थप गर्नुपर्छ’ कोइराला भन्छिन्, ‘गोरखाको ३२ ग्रामीण सडकमा साझाका बसहरु चलाउन सकेमा यात्रुले सुख पाउँछन् ।’ साझाको बस गोरखाको सडकमा गुडेपछि बजारबासी पनि खुसी भएका छन् । साझाले बसपार्कमा टिकट काउण्टर पनि संचालनमा ल्याएको छ ।

यातयात ब्यबसायी समिति गोरखा, पृथ्वीराजमार्ग बस संचालक समिति र आरुघाट यातायात प्रालिले गोरखामा यात्रुबहाक बस संचालनमा छन् । साझाको बस हरेक दिन बिहान ८ बजे गोरखा–काठमाडौंका लागि छुट्ने बताइएको छ । साझाले आफ्नो सेवालाई नियमित तथा थप गुणस्तरीय बनाउनुपर्ने यात्रुहरु बताउँछन् ।

annapurnapost