केसी कमजोर हुँदै
अतुल मिश्र
आश्विन १४, २०७३- पाँच दिनदेखि नवौं आमरण अनसनमा बसेका प्रा.डा. गोविन्द केसीको समर्थनमा चिकित्साशास्त्र अध्ययन संस्थान, त्रिवि शिक्षण अस्पतालका रेजिडेन्ट चिकित्सकहरुले आइतबारदेखी पठन पाठनमा भाग नलिने भएका छन् ।
डा. केसीको माग छिटो पुरा गर्न दबाब दिन गत बिहीबारदेखी रेजिडेन्ट चिकित्सकहरु कालो पट्टि लगाएर काम गर्दै आएकोमा नेशनल रेजिडेन्ट डक्टर्स एसोसिएसनले आइतबार देखि पठन पाठनमा सरिक नहुने निर्णय गरेको हो ।
मुलुकको चिकित्सा शिक्षा र सेवामा सकारात्मक सुधारसँग डा. केसीको माग जोडिएको उल्लेख गर्दै एसोसिएसनले अनसनलाई सार्थक विन्दुसम्म पुर्याए मात्र आम नेपालीले चिकित्सा शिक्षा र सेवाको क्षेत्रमा राहत पाउने जनाएको छ ।
विस्तारै केसीको गल्न थाले पनि हालसम्म सरकारी निकायका पदाधिकारीहरु डा. केसीसँग माग बारे सोध–खोज गर्न नआएको गुनासो रेजिडेन्टहरुको छ ।
डा. केसीको गिर्दो स्वास्थ्यलाई ध्यान दिँदै सरकार र सम्वद्घ निकायले छिटो माग पुरा नगरे अप्रिय निर्णयहरु लिन बाध्य हुने चेतावनी दिँदै रेजिडेन्ट डक्टर्स एसोसिएसनका सचिव डा. सचित शर्माले भने, ‘सरको ज्यानको कुरा आयो भने हामीहरु आन्दोलनको जुनसुकै अवस्थासम्म पुग्न बाध्य हुने छौं । विपीकेआइएच धरान र न्याम्स, विर अस्पतालका रेजिडेन्टहरु समेत सघाउने छन् ।’
हाल शिक्षण अस्पतालमा करिव दुई सय ५० जना रेजिडेन्ट चिकित्सक एवं करिव साढे चार सय जति एमबिबिएसका विद्यार्थीहरु छन् ।
डा.केसी कमजोर हुँदै
आमरण अनशनको पाँचौं दिन शुक्रबार जारी स्वास्थ्य बुलेटिनमा डा. केसीको स्वास्थ्य विस्तारै कमजोर हुँदै गएको उल्लेख गरिएको छ ।
डा. केसीमा जिउ, मांशपेशी, कहिलेकाँही छातीको दुखाइको समस्या देखिएको छ भने चक्कर आउने समस्या समेत छ ।
उनको ब्लड सुगरको स्तर पनि धेरै कम छ । पिसाबमा एसिटोन देखिन थालिसकेको छ ।
ekantipur