आश्विन १२, २०७३- स्वास्थ्यकर्मीमाथि स्थानीय प्रशासनको रोहबरमा अमानवीय व्यवहार गरिएको भन्दै दोलखा सदरमुकाममा रहेको जिल्लाकै सबैभन्दा ठूलो चरिकोट अस्पतालमा बुधबारदेखि हडताल सुरु गरिएको छ ।

अस्पतालको लापरवाहीका कारण ज्यान गएको भनिएको एकजना नावालकको विषयमा चिकित्सकहरुले गरेको क्षेमायचनाको भिडियो ‘फेसबुक भाइरल’ भएपछि स्वास्थ्यकर्मीहरुले हड्ताल सुरु गरेका हुन् । प्रशासन र प्रहरीसहित देखिने भिडियोमा स्वास्थ्यकर्मीहरुलाई नमस्कार गर्न लगाई भीडको बीचबाट अगाडी लामबद्ध गर्दै माफी माग्न लगाइएको छ । उक्त कार्य गर्न जवरजस्ती गर्दै अपराधी झै उभ्याएरु बेइजती गर्न लगाइएको आरोप स्वास्थ्यकर्मीहरुको छ ।

अस्पतालको आकस्मिक सेवाबाहेक सम्पूर्ण सेवा ठप्प गर्दै स्वास्थ्यकर्मी हड्तालमा उत्रिएपछि विरामीहरुको विचल्ली भएको छ । सम्पूर्ण उपचार सेवा निशुल्क रहेको सरकारी र निजी क्षेत्रको व्यवस्थापनमा सञ्चालित अस्पतालमा दैनिक सरदर तीन सय मानिसहरु स्वास्थ्य जाँच गर्न आउँछन् । शल्यकृया, औषधी शैयामा सम्पूर्ण निशुल्क भएको अस्पतालप्रति आकर्षित हुँदै आएका मानिसहरु विनाजानकारी बन्द भएको अस्पतालको हाताबाट निरास हुँदै फर्किएका थिए । सरकारले देशमै पहिलो अभ्यासस्वरुप २०७२ माघ महिनादेखि नेपाल सरकार र न्याय हेल्थ नामक गैरसकारी संस्थाले निशुल्क अस्पताल सेवा सुरु गरेको हो ।

बान्ता हुने र पेट दु:ख्ने समस्या देखिएपछि अस्पाताल ल्याइएका अढाइ बर्षिय महादेव रिजालको गएको विहिवार अस्पतालमा निधन भएको थियो । उक्त दु:खदायी घटनामा देखिएको त्रुटीलाई अस्पतालले स्वीकार गर्दै माइन्यूटसमेत गरिएको छ । परिवारको आफन्तहरुले अस्पतालको चरम लापरबाहीका कारण बच्चा गुमाउनु परेकोमा दु:ख व्यक्त गर्दै लाभको बार्गेनिङ भन्दा पनि सेवा सुधारका लागि गरिएको प्रयास भनेका छन् । मृतकका हजुरबुबा इन्द्रबहादु्र रिजालले आगामी दिनमा अरु कुनै मानिसले अस्पतालको चरम लापरबाहीले ज्यान गुमाउन नपरोस भन्ने हेतुले माफी माग्नुपर्ने माग राखिएको बताए ।

सहायक प्रमुख जिल्ला अधिकारी औलाखबहादुर आलेको संयोजकत्वमा छानवीन समितिसमेत गठन गरेर प्रतिवेदन नआइसक्दै माफी मगाइएको र त्यो सार्वजनिक गरेको प्रति जिल्लास्थित स्वास्थ्यकर्मीहरुको हितमा स्थापित संघसंस्थाले विरोध जनाएका छन् । घटनाको छानवीन हुँन बाँकी हुँदै स्थानीय प्रशासनको प्रतिनिधिहरुको उपस्थितिमा अमानवीय, अस्वभाविक, सुनियोजित रुपमा अपमानित गर्दै अत्यन्त घृणित व्यवहार प्रर्दशन गर्दै माफी मगाइएको भिडियो सामाजिक सञ्जालमा फैलाइनुको जघन्य अर्को अपराध भएको जिल्लास्थित ९ वटा संस्थाहरुले विज्ञप्ति जारी गरेर भत्सर्ना गरेका छन् ।

अस्पतालको चिकित्सकहरुले अस्पतालमा हुनसक्ने क्षेती र आफ्नो आत्मरक्षाका निम्ती प्रशासन र भीडको मागअनुसार माइन्युटमा सही गरिएको र माफी मागिएको बताए । भीडले निजी आवास कोठाहरु तोडेर त्यहाँभित्रको दृष्य र माफी मागिएको दृष्यलाई सार्वजनिक गरिदिएपछि देशविदेशका चिकित्सकहरुले समेत हिनताबोध गरेकाले सेवा ठप्प पार्न बाध्य भएको एकजना चिकित्सकले बताए । जिल्ला स्वास्थ्य प्रमुख राजेन्द्रप्रताप शाहले आफु फिल्डमा रहेकोले घटनाबारे बेखवर रहेको बताए । छानवीन समितिका संयोजक औलाखबहादुर आलेले घटनाको प्रतिवदेन आउन बाँकी रहेको जानकारी दिएका छन् ।