आश्विन ११, २०७३- प्रमुख विपक्षी दलका नेता एमाले अध्यक्ष केपी शर्मा ओलीले प्रधानमन्त्री पुष्पकमल दाहालका गतिविधिबारे संसदमा दर्जनौं प्रश्न उठाएका छन् ।

ओलीले प्रधानमन्त्रीको भारत भ्रमणदेखि फरार अभियुक्तलाई भेटेकोसम्म विषयमा गम्भीर प्रश्न उठाए । उनले भारत भ्रमणमा भएको २५ बुदे सम्झौता राष्ट्रिय हित र स्वाभिमानविपरीत भएको भन्दै आलोचना गरे ।

प्रधानमन्त्रीले भारतसँग सम्बन्ध सुधार गरेको भन्ने अभिव्यक्तिको आलोचना गरे । ‘सम्बन्ध के बिग्रिएको थियो र के सपार्नुभयो ?,’ उनले भने, ‘नाकाबन्दी थियो कि, सन्धी सम्झौता अड्किएको थियो कि ? परिणाममामा के देखियो ?’

सरकार परिवर्तन हुनेवित्तिकै विदेश दूत पठाउनुपर्ने र हतारहतारमा भारत जानुको औचित्य पुष्टि गर्न ओलीले चुनौति दिए । उनले भ्रमणबारे सदनलाई जानकारी नदिएकोमा असन्तुष्टि जनाए ।

ओलीले सरकारले आर्थिक अराजकता र राजनीतिक अपराधमा संलग्नलाई उन्मुक्ति दिने तयारी गरेकोमा कडा विरोध गरे ।

भारत भ्रमणमा टिकापुर घटनाका प्रमुख अभियुक्तलाई भेटेकोमा ओलीको आलोचना थियो । ‘राजकीय भ्रमणमा कस्ताले स्वागत गरेछन् तस्बिरले बोलिहाल्यो नि,’ उनले भने । दिल्लीमा प्रधानमन्त्रले टिकापुर घटनामा संलग्न भएको भन्दै खोजी सूचीमा रहेका रेशम चौधरीसँग भेटेका थिए ।

ओलीले आफ्नो सरकारले कोरेको आर्थिक रोडम्यापमा बनेको सरकारले सस्तो लोकप्रियताका लागि प्रचारमुखी काम गरेको बताए । ‘ट्यांकी राखेको थिएँ, पानी भरेको थिएँ, अहिले टुटी खोल्नेले मैले पानी दिएँ भनेर हुन्छ ?,’ उनले भने ।

ओलीले राष्ट्रियता र परराष्ट्र सम्बन्धमा कांग्रेस नीतिविहीन भएको दोहोर्‍याउँदै सरकारका प्रवक्ताले चीनतिर बाटो खोल्दा पर्यावरण बिग्रन्छ भनेको विषयमा धारणा मागे ।