आश्विन ११, २०७३- उपप्रधान तथा गृहमन्त्री विमलेन्द्र निधिले दुर्घटनामा बेपत्ता पूर्वगृहमन्त्री लगायतको खोजीमा सरकारले कुनै कसर बाँकी नराख्ने बताएका छन् ।

पूर्वगृहमन्त्री माधवप्रसाद घिमिरे चढेको गाडी दुर्घटनामा परेको त्रिशूलीको घोप्टेभीरमा निरीक्षणमा आएका गृहमन्त्री निधिले घटना अन्त्यन्तै दु:खदायी भन्दै सरकारले खोजीमा कुनै कसर बाँकी नराख्ने बताएका हुन् । पूर्वगृहमन्त्री घिमिरेका दुई भाइ पनि बेपत्ता छन् ।

घटनास्थलको निरीक्षणपछि गृहमन्त्री निधिले सुरक्षा निकायलाई खोजीमा अहोरात्र खट्न निर्देशन दिए । पूर्वगृहमन्त्री दुर्घटना परेमा सरकार गम्भीर रहेकाले आफू निरीक्षण, अवलोकनमा आएको मन्त्री निधिको भनाइ छ ।

गृहमन्त्रीको टोलीमा गृहसचिव लोकदर्शन रेग्मी, गृहमन्त्रालयअन्तर्गत शान्ति सुरक्षा महाशाखा प्रमुख बालकृष्ण पन्थी, नेपाल प्रहरीका महानिरीक्षक उपेन्द्रकान्त अर्याल, सशस्त्र प्रहरीका आईजीपी दुर्जकुमार राई र राष्ट्रिय अनुसन्धान विभागका प्रमुख दिलीपराज रेग्मी पनि छन् ।

खोजी कार्यमा वाटर क्यामरा, सोनार (पानीभित्र खोज्न मेसिन लगायत उच्चस्तरीय प्रविधि प्रयोग गरिएको उल्लेख गर्दै गृहमन्त्री निधिले अपुग भए विदेशबाट मगाउन सरकार तयार रहेको बताए ।

गोताखोर टोली, विशेषज्ञ प्राविधिक टोली खोजीमा दिनरात खटिएको भन्दै गृहमन्त्री निधिले आवश्यक सहयोग गर्न सरकार जुनसुकै समयमा तयारको वचन दिए ।

घटनास्थल चितवनको घोप्टेभीर अवलोकनपछि गृहमन्त्रीको टोली भारतसँग सीमा जोडिएको नवलपरासीको त्रिवेणीतर्फ गएको छ ।

खोजीमा नेपाल प्रहरी, सशस्त्र प्रहरी, नेपाली सेनाका गरी पाँच सयभन्दा बढी खटिएका छन् ।

गृहमन्त्रीको टोली भरतपुरमा रहेको जुनियर प्रहरी अधिकृत शिक्षालयको अवलोकनपछि मंगलबार नै काठमाडौं फर्कनेछ । टोलीसँगै घाइते चालक विष्णु राईलाई काठमाडौं ल्याइनेछ ।

मुस्ताङमा बाबुको सोह्रश्राद्ध गरेर फर्कंदै गरेका घिमिरे र उनको परिवार चढेको गाडी आइतबार त्रिशूलीमा खसेको थियो । दुर्घटनामा आमासहित तीन जनाको मृत्यु भएको थियो ।