सडक विस्तारका क्रममा वर्षयामसँगै खाल्डाखुल्डीयुक्त भएको बाटोलाई पुरेर असोज १० गतेदेखि सडकमा सहज रुपमा सवारी चल्ने व्यवस्था मिलाइने ठेकेदारहरुले बताएका छन् ।
चितवनका प्रमुख जिल्ला अधिकारी विनोद प्रकाश सिंहको अध्यक्षतामा भएको बैठकमा नारायणगढ मुग्लिङ सडक सुधार आयोजनाका प्रमुख चन्द्रनारायण यादवले असोज ८ गतेसम्म उक्त सडक खण्डका सम्पूर्ण खाल्डाखुल्डी पुरिने र १० गतेसम्म सडक ग्रडिङको काम सक्ने जानकारी दिए ।
उक्त सडकमा जिल्ला ट्रफिक प्रहरी कार्यालय विभिन्न ३२ स्थानलाई दुर्घटनाग्रस्तको क्षेत्रको रुपमा पहिचान गरि न्यूनीकरणको लागि पहल गर्न दिएको सुझाव अनुसार काम अगाडि बढेको यादवले बताए ।
हालसम्म उक्त स्थानमा ४० प्रतिशत काम सकिएको र असोज १० गतेसम्म दुर्घटना न्यूनीकरणको लागि गरिएको काम सत प्रतिशत पुरा हुने यादवले बताए ।
लेन मिच्नेलाई तुरुन्त कारबाही गर्नका लागि आग्रह गर्दै यादवले दसैँ भरीमा उक्त स्थानमा यातायात अवरुद्ध नहोस् भनेर सावधानीका कामहरु समेत सञ्चालन गरेको बताए ।
आँपटारीदेखी मुग्लिङसम्मको करिब ३४ किलो मिटर क्षेत्रफलमा विभिन्न तीन वटा कम्पनीहरुले सडक सुधारको काम गरिरहेका छन् ।
बैठकमा सहभागी भएका तीन वटै कम्पनीका प्रतिनिधिहरुले धेरै लोड बोकेका सवारी साधन र पानी परिहेका कारण सडक बिगि्रएको बताए । बारम्बार पहिरो खस्नु र साँघुरो बाटोको कारण समेत सडक अवरुद्ध हुने गरेको निर्माण कार्यमा सहभागीहरुको भनाइ छ ।
अगस्ट ३१ सम्म ३३ दशमलब ४२ प्रतिशत सडक निर्माण भइसक्नुपर्ने भए पनि २५ दशमलब ७१ प्रतिशत मात्र निर्माणको काम भएको आयोजनाका इन्जिनियर शिव खनालले बताए । उक्त स्थानमा हाल बारम्बार सडक अवरुद्ध हुने भएकाले यात्रुहरु मर्कामा पर्ने गरेका छन् ।
onlinekhabar
