आश्विन १, २०७३- नेकपा (एमाले)का अध्यक्ष केपी ओलीले सरकारले नै देशलाई मुठभेडतिर लैजान खोजेको आरोप लगाएका छन् । उनले अहिलेको सरकारले अर्काको एजेन्डाको भारी बोकेको र राजनीतिक रुपमा द्वन्द निम्त्याउन खोजेको समेत बताए ।

मोतिदेवी जेष्ठ नागरिक आवास गृहको शनिबार नागार्जुन नगरपालिका–१० भीमढुङ्गामा उद्घाटन गदै अध्यक्ष ओलीले नेपाल देश नेपालीले नै चलाउने बताउँदै अरुको आवश्यकता नपर्ने जिकिर गरे । नेपालको संविधान अरुका एजेन्डाका लागि संशोधन हुन नसक्ने उनको भनाई छ । उनले संविधान संशोधन नेपाली जनतालाई मान्य र स्वीकार्य हुने खालको हुनुपर्ने धारणा राखे । उनले संविधान अनेकथरिसँग सम्झौता गरेर बनाइएकाले अहिले केहीले देशभित्र र बाहिर संविधान संशोधन र स्वीकार्य भन्ने शब्द चट्की र षड्यन्त्रपूर्वक रुपमा उठाइरहेको बताए ।

प्रधानमन्त्री अरुको एजेन्डामा संविधान संशोधन गर्ने प्रयासमा लागेको बताउँदै उनले त्यसलाई नेपाली जनताले स्वीकार नगर्ने उल्लेख गरे । ‘जहाँसुकै सम्झौता होस् जुनसुकैसँग होस् तर नेपाली जनताले राष्ट्रिय हितका लागि काम गर्छन्’ उनले भने–‘हामी त्यस्ता जुनसुकै ठाउँमा नेपालको हितविपरीत गरिएको सम्झौता कार्यान्वयन हुन दिने छैनौँ ।’