माधवकुमार ओली/उज्यालो
रोल्पा, भदौ ३० – चिकित्सा क्षेत्र सुधारका निम्ति निरन्तर लडिरहेका बरिष्ठ चिकित्सक डा. गोविन्द केसी बुधवार बिहानै रोल्पाको सदरमुकाम लिबाङको टुँडिखेलमा देखिनुभयो । मंगलवार बेलुकी लिबाङ आएका डा. केसीको साथमा अरु कोही थएनन् ।
दुईवटा झोला बोकेका उहाँलाई धेरैले चिनेनन्, कतिपयले भने चिने । मंगलबार लिबाङको एक होटलमा खाना खाएर उहाँ अर्काे होटलमा बास बस्न जानुभयो । त्यतिबेलासम्म उहाँ डा. गोबिन्द केसी हो भन्ने कसैलाई थाहा भएको थिएन ।
होटलमा केहीले डा. गोविन्द केसी जस्तै ठानेर सोध्दा उहाँले डा. गोविन्द केसीलाई आफूले नचिन्ने र आफू पनि त्यो व्यक्ति नभएको प्रतिक्रिया दिनुभयो । मंगलवार काठमाडौंबाट सार्वजनिक गाडी चढेर रोल्पाको दुर्गम गाउँमा स्वास्थ्य शिविर चलाउन हिँडेका डा. केसीले जिल्लाका कुनैपनि व्यक्ति तथा स्वास्थ्य सस्थासँग सम्पर्क गर्नुभएन ।
एक्कासी जिल्ला आउनु भएका उहाँले बुधवार विहान लिबाङस्थित केहि स्वास्थ्यकर्मीहरुसँग सल्लाह गरी सुलिचौरमा स्वास्थ्य शिविर सञ्चालन गर्ने निधो गर्नुभयो । दुईवटा झोला र २/३ कार्टुन औषधि साथमा लिएर उहाँ विहानै सुलिचौरका लागि गाडी चढ्नुभयो ।
सुलिचौर पुगेपछि उहाँ सुलिचौर प्राथमिक स्वास्थ्य केन्द्रमा पुगेर डा. मिलन बज्राचार्यसँग भेट गर्नुभयो । डा. बज्राचार्यसँग भेटेर आफ्नो परिचयसहित आफ्नो कामका बारेमा बताउनुभयो । डा. बज्राचार्यले पनि सहयोग गर्ने बताएपछि उहाँ खाना खान निस्कनुभयो ।
डा. बज्राचार्य आफूसँगै खान अनुरोध गरेपनि डा. केसीले नमानेर बाहिर होटलमा खानुभएको थियो । सुलिचौरमा स्वास्थ्य शिविर सुरु गर्ने भनेपछि सुलिचौरका रेडक्रस तथा सरोकारवालाहरुले पूर्वजानकारी नभएको भन्दै सुरुमा बेवास्ता गरेपनि पछि भने सहयोग गरेका थिए । 
शिविर बिहिवार बेलुकीसम्म चल्ने बताइएको छ । पूर्वजानकारी नभएकाले शिविरको पहिलो दिन धेरै बिरामी नआएपनि बिहीबार भने भिड लाग्ने अनुमान गरिएको छ ।
सरकारले आफ्नो माग सम्बोधनको लागि चासो नदेखाएको भन्दै उहाँले सरकारको विश्वास नभएको बताउनुभयो । अहिले देशको स्वास्थ्य माफिया र दलालहरुले चलाएको उहाँको भनाई छ ।
चिकित्सा शिक्षा नीति अलपत्र पारेको र नयाँ मेडिकल कलेजलाई सम्बन्धन दिन लागेको भन्दै सरकारलाई नवौं सत्याग्रहको अल्टिमेटम दिएका डा. केसीले आफ्नो माग पूरा नभए रोल्पाबाट फर्के लगत्तै पुनः अनसन सुरु गर्ने बताउनुभएको छ ।
ujyaaloonline