मोहनराज पन्त (बायाँ) र डिल्लीराम भट्ट
२९ भदौ, काठमाडौं । नेपाल विद्युत प्राधिकरणको कार्यकारी निर्देशक र बुढीगण्डकी जलविद्युत आयोजनाको प्रमुख बनाइदिन भन्दै आकांक्षीहरु शक्ति केन्द्र धाउन थालेका छन् ।
यसरी शक्ति केन्द्र धाउनेहरुमा माओवादी केन्द्र निकटका इञ्जिनियरहरु रहेका छन् । उल्लेखित लाभका पदमा आफू पुग्नसके पुरापुर सहयोग गर्ने आश्वासनसहित उनीहरुले सत्तारुढ दलका नेता, मन्त्री हुँदै प्रधानमन्त्रीलाई समेत भेटिरहेका छन् ।
शक्तिकेन्द्र धाउनेहरुमध्ये इञ्जिनियर डिल्लीराम भट्ट पनि एक हुन् । गोरखा जिल्लाका भट्ट अहिले बुढीगण्डकी हाइड्रोको इन्जिनियर छन् । आफू बुढीगण्डकी आयोजनाको प्रभावित र स्थानीय पनि भएकाले आयोजना प्रमुखमा उनको दावी छ ।
यसअघि उनले स्थानीय विकास मन्त्रालय अन्तर्गतको प्रोजेक्ट डोलिडारमा करार इन्जिनियरका रुपमा काम गरेका थिए । बुढीगण्डकीको प्रमुख बनाइदिन भन्दै भट्टले माओवादी केन्द्रकी नेतृ पम्फा भुसाल मार्फत लविङ गरिरहेको स्रोतको दावी छ ।
अनलाइनखबरसँग कुरा गर्दै भट्टले भने, ‘प्रधानमन्त्रीज्यूसँग भेटिसकेको त छैन तर उहाँहरुसँग राम्रो सम्वन्ध भएकाले भेट्न बोलाइरहनु भएको छ ।’
उनले अघि भने, ‘मेरो सम्भावना पनि छ ।’
भट्टसँगै बुढीगण्डकी आयोजना प्रमुख बन्ने दौडमा धादिङका रामलाल तुलाधर पनि छन् । उनी अहिले विद्युत प्राधिकरणको बोर्ड सदस्य छन् ।
यस्तै गोरखा नाम्जुङका रामेश्वर लामिछाने पनि बुढीगण्डकी आयोजनाको प्रमुख बन्ने दौडमा छन् ।
विद्युत प्राधिकरणको कार्यकारी निर्देशकमा को ?
यस्तै विद्युत प्राधिकरणको कार्यकारी निर्देशकबाट मुकेशराज काफ्लेले राजीनामा दिएपछि उक्त पदमा पुग्न पनि माओवादी केन्द्र निकटका इञ्जिनियरबीच प्रतिस्पर्धा चलेको छ ।
विद्युत प्राधिकरणका प्रमुख मुकेशराज काफ्लेले हालै पदबाट राजीनामा दिएका छन् र सो पद अहिले रिक्त छ ।
जसरी पनि मलाई त्यो पदमा नियुक्त गरिदिनु पर्यो भन्दै पिपुल्स हाइड्रोमा प्लानर (योजनाकार) पदमा कार्यरत मोहनराज पन्त लागिपरेका छन् । बाग्लुङका पन्तले प्रधानमन्त्री प्रचण्ड र ऊर्जामन्त्री जनार्दन शर्मा ‘प्रभाकर’लाई छुट्टा-छुट्टै भेटेर लविङ गरिरहेको स्रोतको दावी छ ।
पन्तसँगै रामलाल तुलाधर र रामेश्वर लामिछाने पनि उक्त पदका लागि आकांक्षीका रुपमा देखिएका छन् । तुलाधर र लामिछाने सकेसम्म विद्युत प्राधिकरणको कार्यकारी निर्देशक बन्ने दाउँमा छन् । त्यो नपाए बुढीगण्डकी आयोजनाको प्रमुख बनाउनुपर्ने भन्दै शक्ति केन्द्र धाइरहेका छन् ।
‘कोही-कोही त इच्छाएको पदमा पुग्न बि्रफकेस नै बोकेर नेताहरुको दैलो चहार्दै हिँडिरहेका छन्,’ ऊर्जा मन्त्रालय स्रोतले भन्यो ।
onlinekhabar
