भाद्र २४, २०७३- सदन चलिरहेकै बेला सांसदहरु एक गैरसरकारी संस्थाको कार्यक्रमको लागि बुढानिलकण्डस्थित पार्क भिलेज रिसोर्ट हिंडेपछि संविधान कार्यान्वयनसम्बन्धी महत्वपूर्ण विधेयक अलपत्र परेको छ ।

संसदको आजको कार्यसूचीमा उच्च अदालत गठनसँग सम्बन्धित तीन वटा विधेयक पारित गर्ने कार्यसूची थियो । तर, ३० भन्दा बढी सांसदहरु नेशनल डेमोक्रेटिक इन्स्टिच्युट नामक अन्तर्राष्ट्रिय गैरसरकारी संस्थाले आयोजना गरेको द्वन्द्व व्यवस्थापन सम्बन्धी कार्यक्रममा भाग लिन गएका कारण संसदमा कोरम नपुगेको हो ।

आजको बैठकमा नेमकिपाका सांसद डिल्लीराम काफ्लेले कोरम नपुगेको बारे प्रश्न राखेका थिए । संसदमा गठना गर्दा उपस्थित सांसदको संख्या एकसय २६ मात्र थियो । कुनै पनि बिषयमा छलफल गर्नको लागि संसदको एक चौथाई संख्या अर्थात एकसय ४९ संख्या आवश्यक पर्छ ।

संसदमा कोरम पुर्‍याउने जिम्मेवारी सत्तापक्षको हो ।

संसद बैठक चलिरहेको बेला दुईवटा पर्यटक बोक्ने माइक्रोबस संसद भवन परिसरमा आइपुगेको थियो । बैठक चलिरहेकै बेला महिला सांसदहरु माइक्रो चढेर द्वन्द्व व्यवस्थापन सम्बन्धी आवासीय गोष्ठीमा भाग लिन हिंडेका हुन् ।

आजको बैठकमा न्याय परिषद् विधेयक, न्याय प्रशासन विधेयक र न्याय सेवा आयोगक विधेयक पारित गरियोस् भन्ने प्रस्ताव दर्ता गरिएको थियो ।

घन्टी बज्दाबज्दै उपप्रधानमन्त्री महरा बाहिरिए
संसदमा कोरमको प्रश्न उठेपछि बाहिर रहेका सांसदहरुलाई भित्र आउन मौका दिन घन्टी बजाइएको थियो । तर, घन्टी बजाइरहँदा उपप्रधान तथा अर्थमन्त्री कृष्णबहादुर महरा संसद बैठकबाट बाहिरिए ।

बैठकमा कोरमको प्रश्न उठ्नुअघि अर्थमन्त्रीसँग सम्बन्धित छलफल भएको थियो । आफूसँग सम्बन्धित छलफल सकिएलगत्तै महरा बैठकस्थलबाट उठेर हिंडेका हुन् ।

संसदमा कोरम पुर्‍याउनु सत्तापक्षको दायित्व हुने भए पनि बैठकस्थल बाहिर रहेका सांसदहरुले पनि घन्टी बजेको प्रति वास्ता गरेनन् ।