भाद्र १९, २०७३- भूकम्प प्रभावित जिल्लामा पनि जोखिमयुक्त गाउँ/टोल पहिल्याउन खानी तथा भूगर्भ विभागले थप विज्ञको टोलीलाई विभिन्न ४० जिल्लामा स्थलगत अध्यनमा पठाउने भएको छ ।

राष्ट्रिय पूननिर्माण प्राधिकरणसँगको समन्वय राख्दै विभागले थप जिल्लामा भूगर्भविद/प्राविधिकको टोली पठाउने भएको विभागका उपमहानिर्देशक डा. सोमनाथ सापकोटाले कान्तिपुरलाई बताए । यसअघि, गत महिनामात्रै भूकम्पप्रभावित ९ जिल्लाका १ सय १७ गाउँवस्तीमा स्थलगत भौगार्भिक अनुगमनको समूहले जोखिमयुक्त वस्तीको पहिचान गरेको थियो ।

१ सय १७ मध्ये ५७ वटा मानव वस्तीलाई ‘जोखिमयुक्त’ ठहर गर्दै तत्काल अन्यत्र सुरक्षित स्थानमा बसोबास गराउनुपर्ने भुगर्वविदको अध्ययनले देखाएको छ । विभागले झण्डै एक महिनाको अवधी लगाएर गरेको अध्ययनमा भूकम्प प्रभावित मध्येका रामेछाप, नुवाकोट, ओखलढुङ्गा, धादिङ, रसुवा, गोरखा, दोलखा, सिन्धुपाल्चोक र काभ्रेपलान्चोक जिल्ला समेटिएका थिए ।

पहिलो समुहमा विभागका भूभर्गविदहरु सुजन देवकोटा (गोर्खा), नारायण अधिकारी (धादिङ), विश्व सिलवाल (नुवाकोट), गौतम खनाल (रसुवा), सन्तोष ढकाल (सिन्धुपाल्चोक), मोनिका झा/सुस्मिता भण्डारी (दोलखा), सुरेश श्रेष्ठ (रामेछाप), शिव बास्कोटा (ओखलढुङ्गा) र डा. जनक चन्द (काभ्रेपलान्चोक) मा स्थलगत अध्यनमा खटाइएको थियो । पुननिर्माण र पुर्नस्थापनाको प्राथमिकता निर्धारण गर्ने क्रममा जोखिमयुक्त वस्तीको निर्धारण थालिएको हो ।