भाद्र १६, २०७३- प्रहरीले सिरहाको गोलबजार–४ बाट ७ कक्षासम्म मात्र पढेका नक्कली डाक्टरलाई पक्राउ गरेको छ । भारतको बिहार, मधुवनी जिल्लाको सोनामत्तीका ३५ वर्षीय रामजी दासलाई इलाका प्रहरी कार्यालय गोलबजारले पक्राउ गरेको छ ।

दासले गोलबजारमा मजेबुल अन्सारीको घर भाडामा लिएर निजी क्लिनिक संचालन गर्दै आएको अवस्थामा पक्राउ गरिएको प्रहरी निरीक्षक राजेन्द्र कुमार उपाध्यायले बताए ।

कक्षा ७ सम्म मात्रै अध्ययन गरेका उनले ‘डाक्टर रामजी दास, एमबिबिएस र एएम, जेनरल फिजिसियन एण्ड सर्जन’ लेखिएको बोर्ड लगाएर बिरामीहरुलाई ठगी गर्दै आएका थिए । बिरामीहरुको गुनासोको आधारमा पक्राउ गरेर अनुसन्धान गर्दा उनी नक्कली डाक्टर भउको खुलेको प्रहरीले जनाएको छ ।

उनको क्लिनिकबाट लाखौंको औषधि, बिरामी पुर्जालगायतको कागजात प्रहरीले बरामद गरेको छ । उनले हाइड्रोशील, बबाशिर, भोकन्दर, बाथ रोग, दिर्घ रोगलगायत रोगको उपचार गर्छु भनेर ठगी गर्दै आएका थिए ।

‘योग्यता नै नभएका व्यक्तिले यस क्षेत्रका बिरामीहरुलाई ग्यारेन्टीका साथ रोग निको हुने भन्दै सामान्य रोगको उपचारमा मोटो रकम असुली गरी ठगी गर्दै आएकोले पक्राउ गरी ठगी मुद्दा दत्र्ता गरेर कारबाही प्रक्रिया अगाडी बढाएको छौं,’ प्रहरी निरीक्षक उपाध्यायले भने, ‘दाससँगै उनको ठूलो सञ्जाल रहेकोले अन्यको खोजी कार्य भइरहेको छ । उक्त सञ्जालबाट सुरक्षा चुनौती समेत हुन सक्ने शंका रहेकोले सुक्ष्म रुपमा अनुसन्धान गरिरहेका छौं ।’
जिल्लास्थित मिर्चैया, सिरहा, सुखिपुर, लहानलगायतको बजारमा भारतीय नागरिकहरुले डाक्टरको छद्म भेषमा बिरामीहरुलाई ठगी गर्दै आएका छन् । उनीहरुले गाउँ–गाउँमा माइकिङ गर्नुको साथै भड्किलो पर्चा, पम्प्लेटले प्रचार प्रसार गरेर बिरामीलाई आकर्षित गर्ने गरेका हुन् । यहाँका बजारस्थित सार्वजनिक स्थलमा उक्त पोष्टर टाँसिएको देखिएपनि सम्बन्धित निकाय अहिलेसम्म मौन रहेको छ ।