तस्बिरः अर्घाखाँची डटकम

भाद्र १२, २०७३- अर्घाखाँचीको हंसपुरमा जिप दुर्घटना हुँदा ११ जनाको मृत्यु भएको छ भने ६ जना घाइते भएका छन् । सदरमुकाम सन्धिखर्कबाट प्युठानको बाँधिकोटतर्फ जाँदै गरेको लु १ ज ४८७८ नम्बरको जिप अर्घाखाँचीको रतनमारे नजिकै आइतबार दिउँसो तीन बजेतिर दुर्घटना हुँदा ११ जनाको मृत्यु भएको हो ।

दुर्घटनामा परी ९ जनाको घटनास्थलमै मृत्यु भएको उद्धारमा खटिएका प्रहरी जवान कुलचन्द्र पोखरेलले बताए । यस्तै २ जनाकाे उपचारका लागि अस्पताल लैजाँदै गर्दा बाटाेमा नै मृत्यु भएकाे हाे । घाइतेहरुलाई जिल्ला अस्पताल सन्धिखर्क लगिएकाेमा गम्भिर घाइते ४ जनाको त्यहाँ उपचार हुन नसकेपछि लुम्बिनी अञ्चल अस्पताल बुटवल लगिएको छ । दुई जनाको भने सन्धिखर्कमै उपचार भइरहेको छ ।  ।

मृत्यु हुनेमा गुल्मी पुर्काेदह–८ का ५९ वर्षीय भेषबहादुर थापा, प्युठान भनभने–१ का ५५ वर्षीय बुद्धिराम परियार, प्युठानक बाङगेमरोठ– ८ का ६८ वर्षीय सोमासिंह रोका मगर, अर्घाखाँची हंसपुर–४ का ४५ वर्षीय रामबहादुर घर्तीमगर, हंसपुरक–४ का मिनबहादुर केसी (रामु) , हंसपुर–१ का ३६ वर्षीय देवबहादुर थापा, सनपा– २ की सीता नेपाली, गाडीधनी किमडाँडाका नारायण राना, धारापानी–६ की ३६ वर्षीया कमला पौडेल, गुल्मी पुर्काेदह–४ का शिव कुँवर र  अर्घाखाँची हंसपुर–५ का हुमबहादुर घम रहेको प्रहरीले जनाएको छ ।

जिप सडकदेखि करिब सात किलोमिटर तल झरेको छ । उकालो चढ्दै गर्दा ब्रेक फेल भएपछि दुर्घटना भएको प्रहरी नायव उपरिक्षक नवरत्न पौडेलले जानकारी दिए । साँघुरो बाटो भएकाले दुर्घटना भएको हो ।

घटनास्थल सदरमुकाम देखि ३० किलोमिटर पश्चिममा पर्छ । गाडी चालक उत्तम श्रीसलाई प्रहरीले नियन्त्रणमा लिएको छ ।