पवन यादव, रौतहट

भाद्र १०, २०७३- चितवनमा बिहीबार राति बस दुर्घटनामा परी एकै टोलका ५ जनाको मृत्यु भएको शोकमा रौतहटको मुडवलवा गाविसको मुडवलवा टोल पुरै शोकमा डुबेको छ ।

घटनाको खबर पाएकै बेलादेखि गाउँका बृद्धबृद्धाहरु एकातिर, महिलाहरु एकातिर, युवाहरु एकातिर समुहमा बसेर दु:ख व्यक्त गरेको भेटियो । सबै व्यक्तिहरु टोलाई रहेका थिए । मृतक परिवारका सदस्यहरु रोइकराई गरिरहेका थिए ।

मुडवलवा ३ का चितरञ्जनप्रसाद यादव, उनका काकाका छोरा रवीरञ्जन यादव, मुडवलवा ६ का राजेश यादव, मुडवलवा २ का रामबालक साह, मुडवलवा ८ का मुकेश रामको दुर्घटनामा परी मृत्यु भएको हो । मृतक सबै जना शनिवार पोखरामा सञ्चालन हुने शिक्षक सेवा आयोगको परीक्षामा सहभागी हुन घरबाट हिडेको परिवारिक स्रोतले जनाएको छ ।

२ छोरा र २ छोरीका बाबु समेत रहेका राजेश परीक्षा सकेर आइतबार नै घर फर्किने आश्वासन आफुलाई दिएको पत्नि नितु देवी यादवले बताईन । ‘चाँडै आउछु भनेका थिए,’ उनी भकानिदै भनिन्, ‘अब कहिलै नआउने भए ।’

एक्कासी निधनको खबर सुन्दा छाँगाबाट खसेझैं भएको उनले बताइन् । उनका छोराछोरीहरु कलिलै छन् । परिवारको लालन पालन गर्ने सबै जिम्मेवारी उनकै काँधमा रहेको परिवारले जनाएको छ ।

राजेश लक्ष्मीपुर बेलबिछवा निम्न माध्यमिक विद्यालयमा पीसीएफ शिक्षक कोटामा गणित, विज्ञान विषयको विषयगत शिक्षकको रुपमा कर्यरत थिए ।

आफ्नो भतिजो मात्र होइन । दुर्घटनाले होनाहार शिक्षक गुमेको काका हरेन्द्रप्रसाद यादवले बताए । ‘घटनाको खबर पाएकै बेलादेखि मुखमा अन्नपानी परेको छैन,’ उनले भने, ‘गामै बिहानदेखि चुल्हो बलेको छैन ।’ घटनाको घबर पछि पुरै गाउँ नै स्तब्ध भएको उनी भकानिदै कान्तिपुरलाई सुनाए ।

त्यस्तै मुडवलवा ३ का एकै परिवारका २ जना दाजुभाइको निधनको खबरले परिवारलाई शोकमा डुबाएको छ । दाजु चितरञ्जन यादव र भाई रविरञ्जन यादवको असमायिक निधनले परिवारलाई ठुलो क्षति पुगेको छ । चितरञ्जन गाउकै नेमधारी वासुदेव माविमा गाणित, विज्ञान र अंग्रेजी शिक्षकको रुपमा कार्यरत थिए । भाइ शिक्षण पेसा छाडेर शिक्षक सेवाकै तयारीमा जुटेका थिए । चितरञ्जनका २ छोरी र एक छोरा छन ।

मुकेश रामकी २० वर्षीया पत्नी कविता पनि मृत्युको खबरपछि बेहोसजस्तै छन् । मुकेश पनि परिवारको हेरचाह गर्ने एक्लै थिए । उनका दाई राजेश राम वैदेशिक रोजगारीको लागी अहिले विदेशमा रहेका छन् । बुआआमा बृद्ध भएका छन् । उनको परिवारका सबै सदस्य निधनको शोकमा विछिप्त अवस्थामा छन ।