भाद्र १०, २०७३- तातोपानी नाका सुचारु हुन नसक्नुमा चीनले नेपालकै कमजोरी रहेको औंल्याउन थालेको छ । नेपाल सरकारले कुन रूपमा नाका खोल्ने भन्ने विकल्प दिन नसक्दा नाका खुल्न ढिलाइ भएको हो ।

सामान मात्र ल्याउने गरी नाका सुचारु गर्न हिउँदमा कुनै समस्या नरहेको चीनको सर्त छ । त्यसका लागि प्रबन्ध मिलाउन नेपाललाई लगातार अनुरोध गर्दा पनि वास्ता नगरेको उसको भनाइ छ ।

न्यालोम (कुती) बाट सिधा सडक निर्माण गर्दै तत्काललाई सिन्धुपाल्चोकको लार्चामा ल्याउने र पछि काभ्रेको पाँचखालमा नयाँ ड्राइपोर्ट बनेमा त्यहाँ सार्ने गरी काम गर्ने चीनको प्रस्ताव छ । तर त्यसमा नेपाल सरकारले तदारुकता नदेखाएको उसको गुनासो छ । यति बेला सडक सर्भेको काम भने दुवै तर्फबाट भइरहेको छ । यो हिउँदमा त्यो बाटो उपयोगमा ल्याउने गरी प्रक्रिया अघि बढेको छ । सामान्य सुधारपछि बाटो खुले पनि स्तरोन्नति र फराकिलो बनाउने काम भने चलिरहने स्रोतले बतायो ।

सरकारका विशेष दूतका रूपमा गत साता बेइजिङबाट फर्कने क्रममा उपप्रधान तथा अर्थमन्त्री कृष्णबहादुर महरालाई ल्हासाका उपप्रमुखदेखि अन्य उच्चअधिकारीले नाका खोल्ने विषयमा नेपालको धारणा र योजना सोधेका थिए । अर्थमन्त्रीले बुझेर जानकारी दिने बताएको स्रोतले जनायो । महराले चीनका तर्फबाट नाका खुला गर्न आग्रह गरेका थिए ।

‘चीन तातोपानी नाका सुचारु गर्न चाहन्छ । त्यसमा काम गर्न थालेको र नेपालभन्दा बढ्ता चिन्तित रहेको उनीहरूले बताएका छन्,’ ल्हासाका महावाणिज्य दूत गोविन्दबहादुर कार्कीले भने, ‘चीनको यो धारणाले पनि नाका खुल्ने संकेत गरेको बुझिन्छ ।’ बेइजिङस्थित नेपाली दूतावास र ल्हासास्थित महावाणिज्य दूतावासबाट सधैं नाका खोल्ने विषयमा छलफल हुने गरेको कार्कीले बताए ।

महरालाई चीनले छेन्दुमा महावाणिज्य दूतावास स्थापनाका लागि समेत आग्रह गरेको थियो । नेपालले भने तातोपानी नाका पूर्ववत् अवस्थामा नफर्काई अन्य काम अघि नबढाउने भएको छ । भन्सार विभागका महानिर्देशक शिशिर ढुंगानाले नाका खोल्ने विषयमा भित्री रूपमा काम भइरहेको बताए । भन्सारका नियमित बैठकहरूसमेत भएका छन् । त्यसमा कसरी अघि बढ्ने भन्दै सकारात्मक रूपमा कुराकानी भइरहेको र तातोपानीबाट छिटै दुईपक्षीय कारोबार हुने उनले दाबी गरे ।

चीनले न्यालुममा भन्सार कार्यालय बनाइरहेको छ । त्यो सकिएलगत्तै सामान आवतजावत हुने अधिकारीहरूले बताए । ल्हासाका लागि पूर्व महावाणिज्य दूत हरि बस्यालले चीन नाका खोल्न सकारात्मक भए पनि भौगोलिक कारण अप्ठ्यारो मानिरहेको बताए । खासाबाट सिगात्से सारिएका व्यापारीहरूले पनि नाका खोल्न जोड दिएका छन् ।