प्रधानमन्त्रीको विशेष प्रतिनिधिको रुपमा भारत भ्रमण सकेर मङ्गलबार स्वदेश फर्कनेक्रममा त्रिभूवन अन्तराष्ट्रिय विमानस्थलमा पत्रकारसँग कुरा गर्दै उपप्रधानमन्त्री एवम् गृहमन्त्री विमलेन्द्र निधि । तस्बिरः रासस
काठमाडौँः उपप्रधान तथा गृहमन्त्री बिमलेन्द्र निधिले आफ्नो भारत भ्रमणले भारतसँगको सम्बन्ध सुध्रिएको दाबी गरेका छन् ।
पाँच दिन लामो भारत भ्रमण पूरा गरेर मंगलबार स्वदेश फर्किएका निधिले त्रिभुवन अन्तराष्ट्रिय विमानस्थलमा पत्रकारसँग कुरा गर्दै भारतसँगको सम्बन्ध सुध्रिएको दाबी गरेका हुन् । ‘मेरो भ्रमणलाई भारतले उच्च सम्मान दिएको छ । यो भ्रमणले भारतसँगको सम्बन्ध सुध्रिएको छ,’ निधिले भने, ‘बीचबीचमा देखिएका सबै गढबढीलाई अन्त्य गरिदिएको छ ।’
निधिले भ्रमणप्रति आफू सन्तुष्ट रहेकोसमेत बताए । ‘मेरो भारत भ्रमण सफल भयो, भ्रमणप्रति म सन्तुष्ट छु,’ निधिले भने ।
भारत भ्रमणका क्रममा भएका भेटवार्तामा आफूले नेपालका राजनीतिक प्राथमिकताबारे जानकारी गराएको निधिले बताए । निधिले भारतीय नेतृत्वसँग नेपाल सरकारको प्राथमिकतामा स्थानीय, प्रादेशीक र केन्द्रीय निर्वाचन रहेको प्रष्ट पारेको जानकारी दिए ।
आफ्नो भ्रमणका क्रममा प्रधानमन्त्री पुष्पकमल दाहाल ‘प्रचण्ड’को भारत भ्रमण, भारतीय राष्ट्रपति प्रणव मुखर्जीको नेपाल भ्रमण र राष्ट्रपति विद्यादेवी भण्डारीको भारत भ्रमण निश्चित भएको निधिले जानकारी दिए ।
भारतीय सत्तापक्ष र विपक्षी नेतासँगको कुराकानीमा नेपाल सरकारले संविधान कार्यान्वयनलाई प्राथमिकतामा राखेको कुरासमेत प्रष्टसँग राखेको निधिले बताए ।
प्रधानमन्त्री पुष्पकमल दाहालको विशेषदूतका रूपमा बिहीबार भारत भ्रमणमा गएका मन्त्री निधिले भारतीय राष्ट्रपति प्रणव मुखर्जी, प्रधानमन्त्री नरेन्द्र मोदी, विदेशमन्त्री सुषमा स्वराज, गृहमन्त्री राजनाथ सिंह, सत्तारूढ भारतीय जनता पार्टीका राष्ट्रिय अध्यक्ष अमित शाह, कंग्रेस आईका नेता एवं भारतीय पूर्वप्रधानमन्त्री डा. मनमोहन सिंह र भारतीय जनता पार्टीका महासचिव राम माधवसँग भेटवार्ता गरेका थिए ।
सबै भेटमा प्रधानमन्त्री दाहालको भदौ ३० देखिको प्रस्तावित भारत भ्रमण, भारतीय राष्ट्रपति मुखर्जीको नेपाल भ्रमणलगायतका विषयमा छलफल भएको थियो । भारतीय उच्च नेतृत्वले मधेस केन्द्रित दलहरूका माग सम्बोधन गरिए नेपालको संविधान कार्यान्वयनमा भारतले सहयोग गर्नसक्ने बताएका थिए। निधिले प्रधानमन्त्री दाहालको भारत भ्रमणअघि संविधान संशोधन प्रस्ताव मन्त्रिपरिषद्बाट अनुमोदन गरी संसद्मा पेस गर्ने विश्वास समेत भारतीय पक्षलाई दिलाएका छन् ।
भारतीय उच्च नेतृत्वसँगको भेटमा निधिले भारतसँगको सम्बन्धलाई सरकारले उच्च महत्व दिएको बताएका थिए । निधिले पूववर्ती सरकारका पालामा सम्बन्धमा आएको तिक्तता बिर्संदै नयाँ रूपमा अघि बढाउन चाहेको समेत उल्लेख गरेका छन् । संविधानमा असन्तुष्ट मधेस केन्द्रित दलका माग सम्बोधन गर्न संविधान संशोधन प्रक्रिया अघि बढाइने विश्वास समेत भारतीय पक्षलाई दिलाएको निधिको दाबी छ ।
annapurnapost