भाद्र ४, २०७३- प्रधानमन्त्रीको विशेषदूतका रूपमा उत्तरी छिमेकी मुलुकको भ्रमण गरी फर्केका उपप्रधान तथा अर्थमन्त्री कृष्णबहादुर महराले ‘चीनका राष्ट्रपति सी जिनपिङ र प्रधानमन्त्री ली खछ्याङले छिटै नेपाल भ्रमण गर्ने’ सकारात्मक सन्देश आफूले ल्याएको बताएका छन् ।

पाँचदिने भ्रमण सकेर शनिबार फर्किएका महराले विमानस्थलमा उत्रिएलगत्तै चीनबाट पहिले राष्ट्रपति स्तरमा र त्यसको केही समयपछि प्रधानमन्त्री स्तरमा भ्रमण हुने जानकारी गराएका हुन् । ‘अब राष्ट्रपतिको भ्रमण लगभग सुनिश्चित नै भएको ठानेको छु,’ उनले संवाददाताहरूसित भने, ‘यद्यपि चिनियाँ पक्षले यसबारे केही समयपछि निर्णय लिनेछ । चिनियाँ राष्ट्रपतिलाई नेपालमा स्वागत गर्न सम्पूर्ण पक्षबाट तयार रहेको जानकारी गराएको छु ।’

उनले उच्चस्तरीय भ्रमणका लागि चीन र नेपाल दुवैले आ–आफ्ना परराष्ट्र मन्त्रालयलाई तिथि र कार्यक्रम तय गर्न समेत निर्देशन दिइसकेको उल्लेख गरे । ‘चीनका राष्ट्रपति सी र प्रधानमन्त्री लीले छिटै नेपाल भ्रमण गर्नुहुनेछ । विशिष्ट व्यक्तित्वको भ्रमणको तिथिमिति तयार भइसकेको छैन । शीघ्र उच्चस्तरीय बैठक र सल्लाह गरी तय हुनेछ,’ उनले भने । महराले चिनियाँ प्रधानमन्त्रीसितको छलफलपछि उच्चस्तरको भ्रमणका लागि दुवै देशका परराष्ट्र मन्त्रालयलाई ‘स्ट्यान्ड बाई’ राखिएको जानकारी दिए ।

चिनियाँ पक्षले महरालाई उनको मिसन सफल होस् भन्ने कामना गर्दै उच्च सम्मान दिएका थिए । भ्रमणका क्रममा महराले विदेशमन्त्री वाङ यी र प्रधानमन्त्री खछ्याङसँग औपचारिक भेटवार्ता गरेका थिए । उनले चिनियाँ कम्युनिस्ट पार्टीका वरिष्ठ नेताहरू र अन्य सरोकारवालालाई पनि भेटेका थिए ।

प्रधानमन्त्री लीले आफू र राष्ट्रपति शीघ्र छिमेकी नेपालको भ्रमण गर्न उत्सुक रहेको महरालाई जानकारी गराएका थिए । लीले नेपालमा नयाँ संविधान जारी भएपछि राजनीतिक स्थायित्व र आर्थिक समृद्धिको नयाँ ढोका खुलेको भन्दै विकासका लागि आफूहरूले गर्नुपर्ने सहयोग तथा साझेदारीबारे समेत कुरा गरेको जानकारी महराले दिए । आर्थिक एवं सामाजिक विकासमा चीनले दिँदै आएको सहयोगलाई निरन्तरता दिने र विकासका लागि नेपालले अघि बढाउने कार्ययोजनामा सहयोग गर्न चीन तयार रहेको जानकारीसमेत दिएका थिए ।
चीनले नेपालसँगको सम्बन्धलाई उचाइमा पुर्‍याउन चाहेको आफूले पाएको उनले बताए ।

चीनले सरकार परिवर्तन नेपालको आन्तरिक मामिला भन्दै नयाँ गठबन्धन संविधान कार्यान्वयन गर्न लाग्ने विश्वास व्यक्त गरेको थियो । नेपाल–चीनबीच थप सहयोगका क्षेत्र खोजी गर्नेबारे चिनियाँ पक्ष निकै सकारात्मक रहेको महराले बताए । उनका अनुसार त्रिपक्षीय आर्थिक करिडोरप्रति चिनियाँ सरकार सकारात्मक छ । यसमा ठोस कुरा हुन भने बाँकी रहेको उनले बताए । यसबाट स्पष्ट हुन्छ, भारतको सहमतिबिना यो अघि नबढ्ने हुनाले नेपाल यसमा अहिले बीचमा रहेको हो । महराले चिनियाँ प्रधानमन्त्री, विदेशमन्त्री र चिनियाँ कम्युनिस्ट पार्टीको अन्तर्राष्ट्रिय विभागका प्रमुख तथा उपप्रमुखसँगको भेट निकै सफल भएको अनुभव आफूले गरेको बताए ।

रासस