चौरजहारी मिसन अस्पतालमा पनि एन्टी स्नेक भाइल नभएकाले त्यहाँका डाक्टर कावेल बुढाले जाजरकोट अस्पतालका डाक्टर राजेन्द्र जिसीलाई एन्टी स्नेक भाईलका लागि अनुरोध गरे। डाक्टर जिसीले शुरुमा आलटाल गरेपनि पछि ८ देखि १० भाइल सम्म उपलब्ध गराईदिने बताए । बीरामीका आफन्तले चौरजहारीबाट रातारात जाजरकोट खलंगा आएर एन्टीस्नेक भाइल लगे । तर, त्यतिले मात्रै जसबीरको स्वास्थ्य अवस्था खतरामुक्त हुन सकेन।

थप भाइलका लागि पुनः जसबीरका आफन्तले डाक्टर जिसीलाई चौरजहारीबाटै फोनमा अनुरोध गरे । डाक्टर जिसीले अस्पतालमा भएको एन्टि स्नेक भाइल थोरै रहेकाले खाली गरेर दिन नमिल्ने जवाफ दिए । तर, आफन्तले निकै अनुरोध गरेपछि ५ भाईल सम्म उपलब्ध गराइदिनेमा सहमत भए । चौरजहारीबाट पुनः जसबीरका आफन्त ५ भाईल एन्टीस्नेकका लागि खलंगा अस्पताल दौडिए।

त्यतिले पनि जसबीरको होस खुलेन । जसबीरका आफन्तहरुले जसबीर बाँच्छन् भन्ने आशा समेत गुमाइसकेका थिए । सोमबार विहानै जसबीरका मीत भाई सहदेव बस्नेतले अस्पताल पुगेर डाक्टर जिसीलाई सर्पदशंको औषधि माग गरे । तर, डाक्टर जिसीले औषधि सकिएको र बाँकी भएको स्टक राख्नुपर्ने जिद्दी गरे । अस्पतालमा संचारकर्मीहरुको पनि उपस्थिति देखेपछि जिसीले फेरि ५ भाईल एन्टिस्नेकको औषधि सहदेवको हातमा थमाए । अहिले जसबीरको अवस्था खतराबाट मुक्त रहेको चौरजहारी मिसन अस्पतालका चिकित्सकहरुले जानकारी दिएका छन् ।

डाक्टर जिसीले चौरजहारीका स्वास्थ्यकर्मीसँग फोनमा कुरा गर्दै तपाईहरु रिस्क नलिनुस्, रिफर गरिदिनुहोस् भनेर फोनमा कुरा गरेको सुनेको जसबीरका आफन्त जयबहादुर बस्नेतले बताए ।

यसबारेमा छानबिन गरी कारबाही गरिने निमित्त प्रमुख जिल्ला अधिकारी जनकराज शर्माले बताए । खलंगा अस्पतालका डाक्टर बोम बिसीसँग कुरा गर्दा एन्टीस्नेक भाईल नै सर्पले टोकेको पुर्ण औषधि नभएको र जिल्ला अस्पतालमा कृत्रिम श्वास दिने सुविधा नभएकाले चौरजहारी रिफर गरिएको बताए । अस्पतालको क्वाटरमा समेत बारम्बार सर्प आइरहने भएकाले केही भाईलहरु आफ्नालागि राख्नुपरेको डाक्टर बिसीले बताए ।

annapurnapost