श्रावण ३२, २०७३- अत्यधिक यात्रु चढाइएको बस बिर्तादेउरालीस्थित कच्चीबाटोमा भार थेग्न नसकी पछिल्तिर चिप्लिएर भीरबाट खस्दा २५ जनाको ज्यान गएको छ । घाइते ३९ जनाको उपचार जारी छ भने बस खस्दै गर्दा हामफालेर ज्यान जोगाएकाहरू घर फर्किएका छन् । ३५ सिट क्षमताको बसमा करिब ९० यात्रु थिए भने ठूलो मात्रामा खाद्यान्न पनि राखिएको थियो ।

काठमाडौंबाट दोलालघाटको मादनकुँडारीतर्फ जाँदै गरेको बा३ख १०६ नम्बरको बस बिर्तादेउरालीस्थित खहरेखोलामा खसेको हो । एसपी राजेशनाथ बाँस्तोलाका अनुसार अरनिको यातायात अन्तर्गत कोसीपारि सेवाको उक्त बसमा क्षमताभन्दा तेब्बर यात्रु थिए । ‘अत्यधिक भारका कारण बस दुर्घटना भएको देखिन्छ,’ उनले भने, ‘कच्ची बाटोमा भारका कारण चिप्लिएर भीरबाट खसेको छ ।

कात्तिकेदेउरालीका १३ र मादनकुँडारीका ८ जनाको मुत्यु भएको थियो । मृतक अन्य छिमेकी गाविसका थिए । दुर्घटनास्थलमा घाइते र मृतक छरिएर रहेका थिए । प्रहरीको उद्धार टोली करिब डेढ घण्टापछि मात्र पुगेको थियो । काठमाडौंबाट बिहान सात बजे हिँडेको बस सवा १२ बजे दुर्घटनामा परेको थियो । घाइते ३९ मध्ये २६ जनालाई उपचारका लागि हेलिकप्टरबाट काठमाडौं र अन्यलाई एम्बुलेन्सबाट काभ्रे अस्पताल लगिएको छ । उनीहरूको ट्रमा सेन्टर र शिक्षण अस्पतालमा उपचार भइरहेको छ ।

घाइते र शव भीरमा छरिएकाले उद्धार गर्न कठिनाइ भएको एसपी बाँस्तोलाले बताए । धुलिखेलबाट ५० किमि टाढा पर्ने खहरेखोलामा सडकबाट डेढ सय मिटर तल खसेको थियो । घटनापछि प्रमुख जिल्ला अधिकारी बालकृष्ण पन्थी, जिल्ला प्रहरी प्रमुख बाँस्तोला घटनास्थल पुगेका थिए ।

घाम लागेको भन्दै चालकले भेटेजति यात्रु चढाउँदै हिँडेका थिए । यो सडक खण्डमा अरनिको यातायात अन्तर्गत कोसीपारि यातायातको सिन्डिकेटका गाडी चल्छन् । हरेक दिन २४ गाडी चल्ने यस खण्डमा हाल १२ वटा मात्रै सञ्चालनमा छन् । थोरै बस चलेका कारण यात्रु खचाखच हुन्छन् ।

३५ सिट क्षमताको उक्त बसमा करिब ९० जना यात्रुका साथै ठूलो मात्रामा खाद्यान्न राखिएको थियो । बसभित्र र छतमा यात्रु खचाखच थिए । खहरेखोलाको उकालो चढ्न लाग्दा बसको इन्जिन बन्द भई पछाडि गुडेर बस अन्यन्त्रित भई भीरबाट तल खसेको थियो । रातोमाटो भएको सडकमा ठिक्क यात्रुसहित गुड्न गाह्रो पर्ने अवस्थामा बढी भार भएपछि दुर्घटना भएको हो ।

बस दुर्घटनापछि चालक अर्जुन गौतम र सहचालक फरार छन् । प्रहरीले उनीहरूको खोजी गरिरहेको छ घाइते यात्रुका अनुसार बसमा दोलालघाटमै समस्या देखिएको थियो । धकेलेर स्टार्ट गरी लगिएको थियो ।

बिर्तादेउराली ४ का घाइते दलमान तामाङले आफू ढोकामा उभिएका कारण बाँच्न सफल भएको बताए । ‘भित्र खुट्टा टेक्ने ठाउँ थिएन, सिट नपाएपछि ढोकामा झुन्डिएको थिएँ,’ उनले भने, ‘म हामफालेपछि बस हेर्दाहेर्दै भीरबाट खस्यो । यात्रु चिच्याउँदै थिए ।’ उनले आफूले सिट नपाउनु नै भाग्य भएको बताए । ‘ढोकामा उभिएकाले म बाँचें,’ उनले काँप्दै भने ।

उनका अनुसार छतबाट हामफाल्नेहरू बाँच्न सफल भएका थिए । अधिकांश मृत्यु हुनेहरूमा भूकम्पपीडित आवास अनुदान सम्झौता गर्न आफ्नो घर फर्कंदै थिए । उनीहरू काठमाडौंमा काम गरेर बस्दै आएका थिए ।

मृतकहरू :
इन्द्रकुमारी लामा, सीता बर्देवा, मुनामाया परियार, उमेश बाँस्कोटा
विष्णु बाँस्कोटा, पन्जा तामाङ, कृष्ण दमाई परियार, सानुमाया तामाङ, छविलाल चौलागाईं, नीलकण्ठ गौतम, औलादसिंह तामाङ, माइली तामाङ, रेशम विक, पर्श‘राम गौतम, गोविन्दप्रसाद गौतम, सीता गिरी, ठूलीकान्छी सुनार, विनोद गौतम, कृष्णहरि बर्देवा, राकेशबहादुर पाण्डे, लीलानाथ गौतम, सुष्मा लामा र सनाखत नभएका २ जना ।