धनगढी : कैलालीको धनगढीबाट सोमबार विहान बझाङका लागि छुटेको सुदूरपश्चिम यातायातको दिवासेवाको बस सोमबार दिउसो साढे तीन बजेतिर दुर्घटना हुँदा तीनजनाको ज्यान गएको छ भने ३५ जना भन्दा बढी घाईते भएका छन्।
क्षेत्रीय प्रहरी कार्यालय दिपायलले दिएको जानकारी अनुसार सुदूरपश्चिम यातायातको ना ५ ख २८३२ नम्बरको दिवासेवाको बस बैतडीमा पर्ने खोडपे–चैनपुर जयपृथ्बीसिहको शिद्धेश्वर गाविस वडा नं ३ बृन्दाबन नजिकै दुर्घटनामा परेको हो ।
बस सडकबाट झण्डै डेढसय मिटर गहिरो खोलमा खसेको सुदूरपश्चिम क्षेत्रका डिआईजी विजयराज भट्टले जानकारी दिए । उनले एक महिला र तीन पुरुष गरी चार जनाको ज्यान गएको प्रारम्भीक खबर आएको बताए ।
स्थानीयवासिले टेलीफोनमा ८ जनाको ज्यान गएको बताएपछि प्रहरीले ८ जनाको भने पुष्टि गरेको छैन । दुर्घटनामा, बसमा सवार सबैजना घाईते भएको प्रहरीले जनाएको छ ।
नेपाल प्रहरीको, खोडपे चौकी, ईलाका प्रहरी कार्यालय पाटनको टोली, जिल्ला प्रहरी कार्यालय बैतडीको टोली र श्रीभावरबाट पनि प्रहरी उद्धारका लागि घटनास्थल पठाईसकेको सुदूरपश्चिम क्षेत्रका डिआईजी भट्टले बताए।
खोडपेको टोली घटनास्थल पुगिसकेपछि, घाईतको उद्धारमा खटिएकाले मृतकको संख्याका बारेमा विस्तृत जानकारी आई नसकेको उनले बताए । घाइते मध्ये १४ जनाको अवस्था गम्भिर रहेकाले उनीहरुलाई डडेल्धुरामा रहेको उपक्षेत्रीय अस्पतालतर्फ पठाईदै गरेको प्रहरीले जनाएको छ ।
सोमबार विहान धनगढीबाट दुई महिला र ७ जना पुरुष गरी ९ जनाको चालान बोकेर गएको उक्त बसमा अत्तरियाबाट यात्रुहरु भरिएको सुदूरपश्चिम बस ब्यवसाय समितिका उद्धार तर्फका उपाध्यक्ष गणेश पाण्डेले बताए।
उनले बस साहु मोहन ठगुन्ना र चालक प्रेम बोहरा पनि गम्भिर घाईते भएको खबर आएको र तीन जना उद्धारका कर्मचारीको टोली घटनास्थलतर्फ पठाईसकेको बताए ।
annapurnapost