श्रावण ३०, २०७३- भूकम्पबाट अति प्रभावित १२ जिल्लामा निजी आवास पुनर्निर्माणमा ३ लाख घरधुरीहरूसँग अनुदान सम्झौता गरिएको संघीय मामिला तथा स्थानीय विकास मन्त्रालयले जनाएको छ । मन्त्रालयका अनुसार साउन ३० सम्म ३ लाख २५ हजार ५ सय ८१ घरधुरीहरुसँग अनुदान सम्झौता सम्पन्न भएको हो ।

पहिलो किस्ता भने ४५ हजार २ सय ८२ घरधुरीले मात्र लगेका छन् । सबैभन्दा बढी ६२ हजार ७ सय १२ घरधुरी अनुदान सम्झौता सिन्धुपाल्चोकमा भएको थियो भने कम तीनमात्र ललितपुरमा भएको छ । ललितपुरमा पहिलो किस्ताको रकम समेत दिन थालिएको छैन ।

करिब १ लाख २७ हजार १ सय ४७ वटा गुनासाहरु दर्ता भएका छन् । मन्त्रालयले सबैभन्दा प्रभावित भन्दै गोरखा, सिन्धुपाल्चोक, रामेछाप, धादिङ, नुवाकोट, दोलखा, ओखलढुंगा, काभ्रेपलाञ्चोक, सिन्धुली, रसुवा, मकवानपुर र ललितपुरमा पहिलो चरणमा अनुदान सम्झौता अघि बढाएको हो ।

भूकम्पबाट क्षतिग्रस्त निजी आवास पुनर्निर्माणका लागि पहिचान गरिएका लाभग्राहीहरुलाई अनुदान हस्तान्तरण गर्न स्थानीयस्तरमा बैंक तथा वित्तीय संस्थाहरु मार्फत आ–आफ्नो क्लस्टरमा परेका लाभग्राहीहरुलाई अनुदान वितरण गर्ने गरि प्रवध मिलाईएको छ ।

साथै, गाविस तथा नगरपालिकाहरुलाई सम्पन्न भइसकेका अनुदान सम्झौताको तेरिज छिटो माध्यमबाट जिविसमा पठाउने र सम्बन्धित जिविसले प्राप्त तेरिज अनुसार यथासिघ्र बैंक खातामा अनुदान रकम हस्तान्तरण गर्ने व्यवस्था मिलाउन मन्त्रालयले निर्देशन दिइसकेको छ ।