वरिष्ठ रंगकर्मी सुनिल पोखरेल अस्पताल भर्ना भएका छन्। गएराति अचानक स्वास्थ्य गम्भिर भएपछि १ बजे नर्भिक अस्पताल लगिएको थियो। उनलाई आइसियूमा भर्ना गरेर अब्जरभेसनमा राखिएको जानकारी उनकी श्रीमती एवम् अभिनेत्री निशा शर्माले जानकारी दिएकी छन्।
‘उहाँलाई अलि गाह्रो भएपछि गएराति अस्पताल ल्याएको हो। मुटु सबै ठीक छ, सिटी स्क्यानमा पनि त्यस्तो गम्भिर समस्या केही देखिएको छैन्। अहिले डक्टर आएपछि थप परिक्षण गर्ने कुरा भएको छ’, उनले सेतोपाटीसँग भनिन्।
निशाका अनुसार सुनिललाई सिजर एट्याक भएको हो। यो एट्याक फेरि हुन सक्ने भएकाले हाल निगरानीमा राखिएको उनले बताइन्। सुरूमा उनलाई गाह्रो भएपछि हर्ट एट्याकको आशंका गरिएको थियो। सुनिललाई सिजर एट्याक भए पनि कुन प्रकारको भन्ने चिकित्सकहरूले यकिन गरिसकेका छैनन्।
निशाका अनुसार न्यूरोको समस्या भएको आशंका रहेकाले थप परिक्षण पछि थाहा हुनेछ।
‘दाइ बोल्नुहुन्छ। मलाई केही भएको छैन् भन्नुहुन्छ तर कहिले होसमा कुरा गर्नुहुन्छ, कहिले बेहोशी किसिमका कुरा गर्नुहुन्छ’, निशाले भनिन्।
setopati