जेष्ठ ८, २०७३- ‘रोआनु’ नामक चक्रवातको असर देखा परेपछि शुक्रबारदेखि नेपालको मौसममासमेत अचानक परिवर्तन भइ वर्षा भएको छ ।

जल तथा मौसम पूर्वानुमान महाशाखाले विशेष बुलेटिन निकालेर उक्त चक्रवात पश्चिम बंगालको खाडीबाट उत्तरपूर्व तर्फ जाने क्रममा रहेको र बंगलादेशतिर अगाडि बढ्ने क्रममा नेपालको मौसमसमेत प्रभावित भएको उल्लेख गरेको छ ।

चक्रवातको असरकै कारण शुक्रबारदेखि मुलुकका विभिन्न भागमा भारी मात्रामा वर्षा भएको महाशाखाका मौसमविद्ले जनाएका छन् । ‘पूर्वी र मध्यक्षेत्रमा हल्कादेखि मध्यमखालको वर्षा हुने र उच्च हिमाली क्षेत्रमा भारी हिमपात हुने सम्भावना देखिन्छ,’ महाशाखाले भनेको छ ।

महाशाखाका मौसमविद् उपसचिव राजु प्रधानांगले रोआनु चक्रवात भारतको भूमीहुँदै बंगलादेशतिर गइरहेकाले त्यसैको असर स्वरुप शुक्रबारदेखि मुलुकमा वर्षा भएको बताए । ‘काठमाडौंक्षेत्रमा भने पश्चिम वायुकोसमेत प्रभाव देखिएको छ,’ प्रधानांगले भने, ‘अझै केही दिन यस्तै रहने देखिन्छ ।’

महाशाखाले पश्चिमि क्षेत्रमा मौसमी गतिविधि बढेका कारण हल्कादेखि मध्यम खालको मेघ गर्जन सहित वर्षा हुने र उच्च हिमाली क्षेत्रमा हल्कादेखि मध्यम खालको हिमपात हुने सम्भावना रहेको उल्लेख गरेको छ ।