फोटो :रासस
‘आर्थिक वृद्धिदर ६.५ प्रतिशतले बढ्छ’
काठमाडौँः प्रधानमन्त्री केपी शर्मा ओलीले नेपाली आफैँले पानीजहाज किन्ने बताएका छन् । मङ्गलबार अखिल नेपाल महिला सङ्घको राष्ट्रिय परिषद्को प्रथम बैठक उद्घाटनपछि बोल्दै प्रधानमन्त्री ओलीले आफैँ पानीजहाज किनेर तीन दिनमा सामान नेपाल भित्र ल्याउँने घोषणा गरे ।
उनले सामान ढुवानी गर्न नयाँ नाका खोलिने बताउँदै केही समयपछि सरकारले बन्दरगाह आफैँ लिने र सञ्चालन गर्ने पनि जानकारी दिए ।
‘हामी आफैँ पानीजहाज किन्छौँ र तीन दिनमा सामान नेपाल भित्र ल्याउँछौँ’, उनले भने, ‘हिन्द र प्रशान्त महासागरमा नेपाली झन्डा गाडेका पानीजहाज गुड्ने छन् ।’
ओलीले आगामी आवमा आर्थिक वृद्धिदर ६.५ प्रतिशत बढाइने समेत बताए । उनले आगामी आवदेखि देश समृद्धि र विकासतर्फ प्रस्थान गर्ने र बजेटले विकासका धेरै बाटालाई सार्ने बताए ।
‘अब नेपाललाई अगाडि बढ्न कसैले रोक्न सक्दैन’, उनले भने, ‘स्वाभिमान, समृद्ध र विकसित रुपमा नेपाल अगाडि बढ्छ ।’
प्रधानमन्त्री ओलीले रोजगारीका अवसर तलदेखि नै सुरु गरिने र त्यस क्रममा गाउँ गाउँमा एकै पटक लाखौँ मानिसलाई रोजगारी दिइने जानकारी दिए ।
एमाले अध्यक्ष ओलीले पुनःनिर्माणको काम दु्रत गतिमा बढेको बताउँदै सरकारले यही जेठ ७ गतेदेखि १५ दिनसम्म स्वयम्सेवक परिचालन गर्ने जानकारी दिए ।
परिषद् बैठकमा देशभरिका २०० भन्दा बढी महिलाको सहभागिता छ । बैठक बुधबारसम्म चल्ने छ ।
रासस