भूकम्पपछिको पुनर्निर्माण अन्तर्गत गोरखामा २ लाख रुपैयाँ अनुदान वितरणको प्रक्रिया सुरु भएको छ । जिल्लाको हंसपुर गाविसबाट अनुदान रकम वितरणको प्रक्रिया औपचारिक रुपमा सुरु भएको हो ।
हंसपुरको काफलडाँडामा भएको कार्यक्रममा प्रमुख जिल्ला अधिकारी नारायणप्रसाद भट्टले रकम वितरणको काम औपचारिक रुपमा सुरु गरिएको बताउनुभएको हो । गाविसका सेतो परिचयपत्र प्राप्त भूकम्पपीडितहरुको नाम सार्वजनिक गर्दै उहाँले अन्य गाविसमा पनि रकम वितरणको काम थालिने बताउनुभयो । सरकारले दिएको दुई लाख रुपैयाँलाई उपयोग गर्दै पुननिर्माणको काम सम्पन्न गर्न स्थानीयवासी आफैं अग्रसर हुनुपर्ने प्रमुख जिल्ला अधिकारी भट्टले बताउनुभयो ।
कार्यक्रममा प्रमुख जिल्ला अधिकारी भट्टले भूकम्पबाट पूर्ण रुपमा घर क्षतिग्रस्त भएका ९ सय ४४ जनाको नाम सार्वजनिक गर्नुभएको थियो । पछिल्लो पटकको तथ्यांक संकलनका क्रममा नाम छुटेकाहरुका विषयमा पुनर्विचार गरिने उहाँको भनाई छ ।
कार्यक्रममा राष्ट्रिय पुननिर्माण प्राधिकरण अन्तर्गत गोरखामा रहने उपक्षेत्रीय कार्यालयका निमित्त प्रमुख गुणराज भट्टराईले दुई लाख रुपैयाँ अनुदान रकम प्राप्त गर्ने तरिकाबारे जानकारी गराउनुभएको थियो । यो क्षेत्रका बासिन्दाले राष्ट्रिय वाणिज्य बैंकको भच्चेक शाखामा खाता खोलेर पैसा लिन सक्नेछन् ।
कार्यक्रममा बोल्दै हंसपुर गाविसका सचीव चुडाबहादुर लुईटेलले पुननिर्माणको काममा स्थानीय निकायको प्रमुखको रुपमा सक्दो सहयोग गर्ने बताउनुभयो । सेवा सुविधा बृद्धिको माग गर्दै गाविस सचिवहरुले पुनर्निर्माणको काममा असहयोग गर्ने बताइरहेका बेला उहाँले स्थानीयबासिन्दालाई आफ्ना कारण कुनै समस्या पर्न नदिने बताउनुभयो ।
कार्यक्रममा हंसपुर गाविसका भूकम्पपीडितहरुले दुई लाख रुपैयाँबाट घर बनाउन नसकिने भन्दै रकम बढाइदिन माग गरेका छन् । केही पीडितले भने रकम बढाउन नसके निर्माण सामग्री ढुवानीमा सहुलियत दिन आग्रह गरे ।
हंसपुरबाट रकम वितरणको प्रक्रिया सुरु गरिएको र चैतभित्र तथ्यांक संकलन सकिएका सबै गाविसमा अनुदान रकम बाँड्न थालिने प्रजिअ भट्टले बताउनुभयो । गोरखाका उत्तरी क्षेत्रका ७ गाविसमा बल्ल तथ्यांक संकलन सुरु भएको छ । अरु सबै गाविस र नगरपालीकामा तथ्यांक संकलन सकिएको छ ।
ujyaaloonline
