फोटो :गाउँमा आएर विद्यालय निर्माणमा श्रमदान गरेको खुसीमा गाउँलेबाट सोमबार सम्मानपत्र ग्रहण गर्दै बेलायती राजकुमार ह्यारी । तस्बिर सौजन्यः जीव गुरुङ
शिवप्रसाद उप्रेती
गोरखाट: आफ्नो गाउँमा ६ दिनसम्म रहेर श्रमदान गरेका बेलायती राजकुमार ह्यारीसँग खुसी भएका गाउँलेले स्थानीय एक डाँडाको नामै ‘ह्यारी हिल’ घोषणा गरेका छन् । लापु गाविस ३ लापुबेसीमा रहेको डाँडालाई यसअघि डम्बुडाँडा भनिन्थ्यो ।
ह्यारीको बिदाइका लागि सोमबार बेलुका आयोजना गरिएको कार्यक्रममा गाविस सचिव दीपेन्द्रप्रसाद शाह, विद्यालयका प्रधानाध्यापक जीव गुरुङ, विद्यालयका अध्यक्ष सुरेश गुरुङ, लेखा समितिका संयोजक सोम गुरुङलगायतले ह्यारी हिलको घोषणा गरे ।
प्रधानाध्यापक गुरुङले मनास्लु पर्यटन पदमार्गमा रहेको नवघोषित ‘ह्यारी हिल’ लाई पर्यटकीय महत्त्वको बनाउन पूर्वाधार तयार गर्ने स्थानीयबीच निर्णय भएको पनि बताए । ‘बाटोमै अग्लो डाँडा छ, गाउँ सबै देखिन्छ । वरिपरिको दृश्य पनि रमाइलो देखिन्छ’, उनले भने, ‘अब आर्थिक स्रोत जुटाएर यहाँ भ्यु टावर, पिकनिक स्पट बनाउने निर्णय भएको छ । विशेषगरी बेलायती पर्यटक आउँदा यसको महत्त्व बढ्नेछ ।’
घोषणा सुनेर ह्यारी अत्यन्तै खुसी भएको प्रधानाध्यापक गुरुङले सुनाए । ‘हामीले कार्यक्रममा विद्यालयनजिकै रहेको डाँडाको नाम ह्यारी हिल राख्ने निर्णय गरियो भनेर घोषणा गर्यौं’, गुरुङले भने, ‘त्यो रूपान्तरण गरेर सुनाउनेबित्तिकै उहाँले अचम्म मानेर ‘ओ…थ्याङयु’ मात्र भन्नुभयो । अनुहार एकदम चम्किलो भएको थियो । अरू केही भन्नुभएन ।’ औपचारिक बोल्न, भाषण गर्न मन नपराउने ह्यारीको स्वभाव रहेको उनले बताए ।
ह्यारीको बिदाइको अन्तिम दिन सोमबार बेलुकी सात बजेदेखि नौ बजेसम्म गाउँलेले सांस्कृतिक घाँटु नाच देखाएका थिए । भूमिराज महिला समूहले दुईवटा नाच र विद्यार्थीले तीनवटा नाच देखाएका थिए । ह्यारीले पनि स्थानीय भेषभूषामा सजिएर गीत गाउनुका साथै नाचेका थिए । ‘हाम्रो पोसाक भाङ्ग्रा र कछाड लगाएर नाचेका थिए’, उनले भने, ‘अंग्रेजी गीत गाएर पनि नाचेका थिए ।’
ह्यारीलाई गाउँलेले सम्मानपत्र पनि प्रदान गरेका थिए । ‘गाउँमा जेजस्तो पाए, त्यस्तै खाए । हामीले भन्दा पनि धेरै दुःख गरे । गाउँले अत्यन्त खुसी भएका छन्’, उनले भने ।
ह्यारी फर्के काठमाडौं
विद्यालय निर्माण गर्न ढुंगामुढा बोकेका ह्यारी मंगलबार काठमाडौं फर्केका छन् । बिहान १२ बजे गाउँबाट बिदा भएका उनी साढे १२ बजे काठमाडौं पुगेको जानकारी गोरखाका प्रहरी प्रमुख एसपी जनकराज पाण्डेयले दिए ।
नेपाली सेनाको सुपर पुमा हेलिकोप्टरबाट ह्यारीलगायत ६ जना ब्रिटिस आर्मी काठमाडौं फर्केका हुन् । उनले ब्रिटिस आर्मीको संस्था टिम रुबिकन यूकेको सहयोगमा निर्माण हुँदै गरेको प्रभातकिरण माध्यमिक विद्यालयको १२ कोठे र चारकोठे दुईवटा भवन निर्माण गर्न ढुंगा फुटाउने, बोक्ने र काठ बोक्ने काममा श्रमदान गरेका थिए । उक्त भवन एक वर्षअघिको भूकम्पले भत्केको थियो ।
मंगलबार उनलाई लिन आएको हेलिकोप्टर लापुबेसीभन्दा केही माथि नौलीखोलाको बगरमा ल्यान्ड भएको थियो । ब्रेकफास्ट खाएर उनी गाउँबाट बिदा भएको विद्यालयका प्रधानाध्यापक गुरुङले बताए । जाने बेला पनि उनले टिम रुबिकन यूके लेखिएको टिसर्ट लगाएका थिए । उनलाई बिदाइ गर्न लापुबेसीका बासिन्दाको लर्को लागेको थियो । तर औपचारिक बिदाइ कार्यक्रम गर्न उनले मानेनन् । ‘स्थानीय बासिन्दा धेरै जम्मा भएका थिए’, प्रअ गुरुङले भने, ‘हाम्रो परम्पराअनुसार बिदाइ गर्न खोज्दा राजकुमारले मान्नुभएन ।’
बिदाइ गर्न खादा र टीका हातमा लिएर आएका गाउँलेले हात मिलाएरमात्र बिदा गरेको उनले बताए । ‘मलाई हिजो बेलुकी नै बिदाइ गरिसक्नुभयो, आज पर्दैन भन्नुभयो’, गुरुङले भने, ‘फोटो खिचाउन पनि मान्नुभएन ।’ जानेबेला लापुबेसी गाउँका लागि र विद्यालयका लागि सहयोग जुटाउन मद्दत गर्ने वचन दिएको उनले बताए । ‘यहाँको दुःख आफ्नै आँखाले देख्नुभएको छ । सहयोग गर्नुहोला । हजूर आफंैले सहयोग गर्नु पनि पर्दैन । सहयोगी संस्थालाई भन्दिए पुग्छ भनेको थिएँ’, गुरुङले भने, ‘उहाँले यहाँको दुःख देखेको मात्र नभई भोगेको पनि भएकाले सक्दो सहयोग गर्ने वचन दिनुभयो ।’
हावाहुरी र परीक्षाको कारणले विद्यार्थीसँग खेल्ने रहर भने पूरा नभएको दुखेसो राजकुमारले गरे ।
annapurnapost
