चैत्र १६, २०७२- पूर्व निर्धारित पाँच दिने नेपाल भ्रमण ६ दिन लम्ब्याएर नेपालमा रमाइरहेका बेलायती राजकुमार ह्यारीको निकै प्रशंसा भइरहेको छ । भूकम्पले क्षतिग्रस्त उत्तरी गोरखाको लापुबेंसीस्थित प्रभात किरण माविको ११ कोठे भवन पुनर्निर्माणमा सघाउन पनि उनी व्यस्त भए ।

नेपाल घुमेर लाखौं नेपालीको मन जितेका ह्यारी सानो छँदा कस्ता थिए ? झण्डै तीन वर्ष उनलाई ‘हुर्काएका’ र हुर्किएपछि पनि पटक–पटक एकसाथ समय बिताएका भूपू गोर्खा क्याप्टेन (रिटायर्ड) कृष्ण गुरुङको स्मृतिमा ह्यारीसँग बितेका धेरै सु:खद क्षण छन् । सेकेन्ड गोर्खा राइफल्समा भर्ती भएर ३० वर्षपछि सन् २००७ मा अवकास लिएका आर्थर डाडाखर्क ४ पर्वतका गुरुङले बेलायती राजपरिवारसँग बिताएको क्षण कान्तिपुरका बेलायत संवाददाता नवीन पोखरेललाई यसरी बताए :

म सेकेन्ड गोर्खा राइफल्समा कार्यरत थिएँ । ह्यारीका बुबा चाल्र्स हाम्रो रेजिमेन्टको कर्णेल–इन–चिफ हुन् । हाम्रो रेजिमेन्टले केन्जिङ्टन प्यालेसमा गोर्खा प्रतिनिधि पठाउने निधो गर्‍यो । त्यही सिलसिलामा म सन् १९८८ देखि १९९० को मध्यसम्म झन्डै तीन वर्ष केन्जिङ्टन प्यालेस (नेपाली दूतावास नजिकै) खटिएँ ।

त्यो बेला प्रिन्स विलियम ७ र ह्यारी ५ वर्षका थिए । स्कुल जाँदा कहिलेकाही स्कुलसम्म लगिदिनु पथ्र्यो । विकेन्डमा म्याक डोनाल्ड्समा खान मन लाग्यो भनेपछि लिन केन्जिङ्टन हाइस्ट्रिट जान्थें म ।

प्रिन्स चार्ल्स र प्रिन्सेस् डायना ‘अफिसियल भिजिट’ मा बाहिर गइरहनुपर्ने भएकाले हामीले ह्यारी र विलियमको रेखदेख गर्दथ्यौं । प्यालेसभित्र धेरै कडाइ र अनुशासन थियो, ह्यारी विलियम गार्डेनभित्रै खेल्थे दगुर्थे । ह्यारीलाई आर्मी युनिफर्म सानैदेखि मन पर्ने हो, मैले लगाएको युनिफर्म उनलाई खुब मनपर्थ्यो । मैले नमस्कार, राम्रो छ… जस्ता नेपाली शब्द बोल्न पनि सिकाएको थिएँ ।

ह्यारी र विलियममा सानैदेखि गोर्खालीको प्रभाव थियो । सन् १९८९ मा केन्जिङ्टन प्यालेस अगाडि मैले ह्यारी र विलियम बोकेको तस्विर स्वर्गीय राजकुमारी डायनाले खिचिदिएकी हुन् ।

म प्यालेसमा हुँदा प्रिन्स चाल्र्स र डायनासँग हङकङ, जोर्डन, इन्डोनेसिया आदि भ्रमण जाने मौका पाएँ । विकेन्डमा वेल्स्, क्रिसमस्को समय सान्ड्रिङहाम हाउसमा राजपरिवारसँग समय बित्थ्यो । चाल्र्स, डायना समरमा स्कटल्यान्डस्थित बालमोरल क्यासलमा शिकार खेल्न जाँदा म पनि साथमा हुन्थें । मैले विन्सोर क्यासल लगायत यूकेका कयौं रमणीय ठाउँ सँगै घुमें राजपरिवारको साथ ।

संयोगले म सन् २००४ मा रोयल मिलिट्री अकाडेमी, स्यान्डस्र्ट आएँ । करिब ४ वर्ष त्यहाँ रहँदा मेरो ब्रिटिस आर्मी अफिसर तालिमका लागि संसारभरबाट आउने विद्यार्थीसँग भेट हुन्थ्यो । त्यही बेला विलियम र ह्यारी पनि आर्मीमा भर्ती हुने योजनामा रहेको सुनें ।

म प्रशिक्षक थिइनँ तर अरु प्रशिक्षकहरु गोर्खाली भएकाले विद्यार्थीसँग मेरो उठबस हुन्थ्यो । फेरि ह्यारी र विलियमसँग निकट हुने साइत जुर्‍यो । त्यतिखेर ती दाजुभाईले आमा स्वर्गीय डायनाको बारेमा मसँग खुबै सोध्थे । सानैमा आमा बितेपछि उनीहरुले आमालाई धेरै ‘मिस’ गरेको चाल पाएँ मैले । आमा जिवितै भएको भए सायद गोर्खा र नेपालीका लागि अझ राम्रो हुन्थ्यो होला भन्ने मलाई लाग्छ ।

गत १२ अप्रिल, २००६ मा प्रिन्स ह्यारी र विलियम रोयल मिलिट्री अकाडेमी, स्यान्डस्र्टबाट दीक्षित हुँदा मैले भेटेर तस्विर नै खिचें । उनीहरुले एकपटक मलाई स्यान्डस्र्टमा कार्यक्रम हुँदा प्रमुख अतिथि पनि बनाएका थिए ।

अहिले राजकुमार ह्यारीको नेपाल भ्रमणले सर्वत्र चर्चा पाउँदा मलाई गर्व र खुशी लागेको छ । ह्यारीले रोयल ड्युटी सोचेभन्दा राम्ररी पूरा गरे ।

ह्यारीका लागि नेपालमा जस्तो सम्मान र स्वागत अन्यत्र कहीँ पनि हुँदैन । ह्यारीले पनि नेपाली र गोर्खा परिवारले गरेको न्यानो स्वागत बिना झन्झट, बिना हिच्किचाहट स्वीकारे । उनले कहिल्यै म बेलायती राजकुमार भनेर घमण्ड नगरेको यहींबाट प्रष्टै बुझिन्छ ।

ह्यारीले पहिला गोर्खालाई मात्र बढी चिन्थे, अब आम नेपालीको विषयमा चिन्ने मौका पाए । यो नेपाल र नेपालीका लागि गौरवको विषय हो । ह्यारीको नेपाल भ्रमणले विश्वभर सकारात्मक सन्देश दिएको छ ।