कैलासबावु श्रेष्ठ/गोरखा
चैत्र १५ गते । गोरखा मिलन समाज पोखराले हालै रक्क्तदान र बनभोज कार्यक्रम सम्पन्न गरेको छ । शान्ति वन बाटिकामा विविध सांस्कृतिक कार्यक्रमहरुका साथ रक्तदान तथा वनभोज कार्यक्रम सम्पन्न गरेको हो । 
गोरखा मिलन समाजका अध्यक्ष सूर्य क्षेत्री, लायन्स क्लब अफ इन्टरनेशनल डिस्ट्रिक्ट ३२५ बी.वानका रक्तदान संयोजक किशोर बराल र लायन्स क्लव अफ पोखरा डल्फिनका अध्यक्ष गोविन्द बहादुर शाहीले प्रथम रक्तदाता देवेन्द्र धिताललाई संयुक्त रुपमा व्लड व्याग हस्तान्तरण गरी प्रारम्भ गरिएको थियो । 
कार्यक्रममा ३४ जनाले रक्तदान गरेको समाजका सचिव तिलक तिवारीले जानकारी दिए ।
यस वर्षको रक्तदान गोरखा मिलन समाज र लायन्स क्लव अफ पोखरा डल्फिनद्वारा संयुक्त रुपमा आयोजना गरिएको थियो । 
ऋषि गिरीको संयोजकत्वमा सञ्चालित वनभोज तथा रक्तदान कार्यक्रममा पोखरामा रहेका गोरखा जिल्लावासीहरु र लायन्स क्लब अफ डल्फिन पोखराका सदस्यहरुको सहभागिता रहेको थियो । 
पोखरामा २०५७ सालदेखि समाजले नियमित रुपमा रक्तदान तथा पारिवारिक वनभोज कार्यक्रम गर्दै आएको छ ।
समाजले पोखरामा विविध लोककल्याणकारी कार्यक्रमहरुका साथै पोखरामा विभिन्न विषयमा उच्च शिक्षा अध्ययनरत गोरखा जिल्ला लगायत २६ जिल्लाका १५२ जना विद्यार्थीहरुलाई छात्रवृत्ति प्रदान गरिसकेको जनाएको छ । 
समाजका अध्यक्ष क्षेत्रीले कार्यक्रमका सहभागी, रक्तदाता र सहयोगीहरु सबैलाई धन्यवाद दिंदै आगामी वर्ष २०७३ वैशाख ११ गते बाँकी रहेका ४९ जिल्लाका गरीब तथा जेहेन्दार विद्यार्थीहरुलाई विभिन्न ५ शीर्षकका छात्रवृत्ति अन्तर्गत २५ लाख रुपैयाँ वितरण गरिने जानकारी गराएका छ । 
तस्बिर :– गोरखा मिलन समाज पोखराको फेसबुक बाट
