१३ चैत, काठमाडौं । नक्कली शैक्षिक प्रमाणपत्रधारी थप २ जना डाक्टर पक्राउ परेका छन् । पक्राउ पर्नेहरुमा रौतहट मतसरी-५ बस्ने ३१ वर्षीय राजिवकुमार झा र बारा बहुअरी-४ बस्ने २९ वर्षीय पृथ्वीनारायण यादव रहेका छन् ।
नक्कली प्रमाणपत्र पेश गरेर एमबिबिएस अध्ययन गरी चिकित्सा पेशा अपनाउन मेडिकल काउन्सिलमा चिकित्सक दर्ता प्रमाणपत्र परीक्षा दिन आएका झा र यादवलाई केन्द्रीय अनुसन्धान व्यूरो सीआईबीले शनिबार परीक्षा केन्द्रबाट पक्राउ गरेको हो ।
झाले सन् २००६ मा बिहार इन्टरमेडियट एजुकेशन काउन्सिलबाट दोस्रो डिभिजन ल्याएको प्रमाणपत्रमा फिजिक्स र केमेष्ट्री बिषयमा बढी नम्बर थप गरेको नक्कली प्रमाणपत्र पेश गरेका थिए ।
सोही आधारमा चीनबाट एमबिबिएस अध्ययन गरी नेपालमा इन्टर्नशीप समेत गरेको र मेडिकल काउन्सिलमा चिकित्सिक दर्ता प्रमाणपत्र परीक्षामा १२ पटकसम्म फेल भएको खुल्न आएको छ ।
यसैगरी यादवले सन् २००६ मा बिहार इन्टरमेडियट एजुकेशन काउन्सिलबाट दोस्रो डिभिजन ल्याएकोमा सम्पूर्ण बिषयहरूमा नम्बर थप गरी पहिलो डिभिजन ल्याएको नक्कली प्रमाणपत्र पेश गरेका थिए ।
सोही आधारमा चीनबाट एमबिबिएस अध्ययन गरी नेपालमा इन्टर्नशीप समेत गरेको र मेडिकल काउन्सिलमा चिकित्सक दर्ता प्रमाणपत्र परीक्षामा १३ पटकसम्म फेल भएको खुल्न आएको छ ।
onlinekhabar