फोटो :प्रचण्डलाई कालोझन्डा देखाउने क्रममा पक्राउ मोर्चाका कार्यकर्ताहरु । तस्बिर: क्रान्ति शाह
क्रान्ति शाह
मोर्चाका १७ जना प्रदर्शनकारी पक्राउ
वीरगन्जः माघ २२ गते नाकाबन्दी खुलेपछि शान्त र सहज बनिसकेको वीरगन्ज शुक्रबार मधेसी दलको प्रदर्शनका कारण दिनभर तनावग्रस्त बन्यो ।
दोश्रो वीरगन्ज महोत्सव व्यपार मेलाको उदघाटन गर्न एमाओवादीका अध्यक्ष पुष्पकमल दाहाल प्रचण्ड वीरगन्जमा आएको विरोधमा मधेसी दलका कार्यकर्ताले शुक्रबार बिहानैदेखि चोक चोकमा प्रदर्शन गरेपछि वीरगन्ज दिनभर तनावग्रस्त बनेको हो ।
प्रचण्ड वीरगन्ज नआउँदै मधेसी दलका नेता कार्यकर्ताहरुले चोक चोकमा बिहानैदेखि टायर बालेर प्रदर्शन शुरु गरेका थिए ।
उनीहरुले प्रचण्डको स्वागतमा महोत्व आयोजकले बनाएका स्वागतद्वार तोडफोड गरि भत्काइदिनुका साथै केहीमा आगजनी पनि गरे ।
वीरगन्जको पावरहाउस ,घण्टाघर र आदर्शनगरमा बनाइएका स्वागतद्वारहरुमा मधेसी दलका कार्यकर्ताहरुले तोडफोड र आगजनी गरेका हुन् ।
घण्टाघर चोकमा शुक्रबार दिउँसो अध्यक्ष प्रचण्डलाई कालो झण्डा देखाउन बसेका १७ जना प्रदर्शनकारीलाई प्रहरीले नियन्त्रणमा लिएको थियो ।
राष्ट्रिय मधेस समाजवादी पार्टीका केन्द्रिय सदस्य राजेशमान सिंह, नेपाल सदभावना पार्टीकी महिला नेतृ मुन्नी श्रीवास्तव, प्रदीप चौरसिया, रेखा साह, सुरेशमान सिंह, रोशन पटेल, बिट्टु सर्राफ, सुशील पटेल, विशाल सर्राफ, शेख मुन्ना, असरफ अली मन्सुर, भुपाल चौरसीया, मनिष कुमार साह, मोहीचन्द कुर्मी, विशाल जयसवाल, रवि सर्राफ, फिरोज बादशाह र मिथिलेश सिंहलाई नियन्त्रणमा लिइएको प्रहरी नायव उपरीक्षक होविन्द्र बोगटीले बताए ।
उनीहरुलाई जिल्ला प्रहरी कार्यालय पर्साको हिरासतमा राखिएको छ । ‘अनुसन्धान भइरहेको छ’, प्रहरी उपरिक्षक राजुबाबु श्रेष्ठले भने, ‘छाड्ने कि नछाड्ने कुरा शनिवार मात्र थाहा हुन्छ ।’
घण्टाघर चोकमा प्रदर्शनकारीलाई नियन्त्रणमा लिने क्रममा प्रहरीको लाठी चार्जबाट नेपाल सदभावना पार्टी पर्साका सचिव कृष्ण पटेल सामान्य घाइते भएका छन् ।
प्रहरीले प्रदर्शनकारीलाई नियन्त्रणमा लिएपछि पनि संघीय समाजवादी फोरम नेपालका केन्द्रिय सदस्यद्वय करिमा बेगम र वीरेन्द्र यादवको नेतृत्वमा रहेका अन्य प्रदर्शनकारीहरुले अध्यक्ष प्रचण्डलाई कालो झण्डा देखाउँदै प्रदर्शन गरेका थिए ।
हिरासतमा लिएका प्रदर्शनकारीलाई रिहा नगरेपछि मधेसी दलका कार्यकर्ताहरुले वीरगन्जको नगवा र छपकैयामा शु्क्रबार बेलुकी टायर बालेर प्रदर्शन गरेका छन् । उनीहरुले थुनामा रहेका प्रदर्शनकारीलाई रिहा गर्न माग गर्दै प्रदर्शन गरेका हुन् ।
मधेस विरोधी संविधान बनाउनमा प्रचण्डले प्रमुख भूमिका खेलेकाले मधेसी जनताले उनको विरोध गरेको नेपाल सदभावना पार्टी पर्साका सचिव कृष्णा पटेलले बताए ।
‘मधेस आन्दोलनमा मधेसीको हत्या हुनुमा प्रचण्डकै मुख्य हात छ’, उनले भने, ‘प्रचण्डले नै मधेस विरोधी संविधान बनाएका हुन्, त्यसैले मधेसी जनताले उनीप्रति आक्रोश पोखे ।’
‘जसले मधेसीको भावना र मर्म बुझन सक्दैन त्यस्तो नेता मधेसमा आउनुको कुनै अर्थ छैन’, लोकतान्त्रिक मुलुकमा विरोध गर्न पाउने नागरिकको अधिकार भएको भन्दै सचिव पटेलले भने, ‘त्यही देखाउन हामीले प्रचण्डको विरोध गरेका हौं ।’
मधेसी दलको प्रदर्शनलाई मध्यनजर गर्दै वीरगन्जको चोक चोकमा ठूलो संख्यामा प्रहरी परिचालन गरिएको थियो ।
annapurnapost