चैत्र ११, २०७२- साझा यातायातले शहरी क्षेत्रमा सहज र गुणस्तरीय सेवा प्रदान गर्न थप ३० ठूला बस ल्याउने भएको छ । साझाले २०७० साल वैशाख १ बाट राजधानीका तीन रूटमा बस सञ्चालन गर्दै आइरहेको छ ।

थप बस काठमाडौं महानगरपालिकाको १० करोड शेयर सहयोगमा ल्याउन लागिएको हो ।

बस ल्याउनका लागि साझा यातायात र भारतीय अशोक लील्यान्ड कम्पनीसँग बिहीबार सम्झौता भएको हो । साझाको तर्फबाट साझा सहकारी लिमिटेडका अध्यक्ष कनकमणि दिक्षित र भारतीय कम्पनीको तर्फबाट गौरव कुमारले सम्झौता पत्रमा हस्ताक्षर गरे ।

साझाका कामु कार्यकारी निर्देशक महेन्द्रराज पाण्डेयले सबै बस गुणस्तरिय हुने बताए । उनका अनुसार बस ४० सिट क्षमताको हुने छ र उभिएर यात्रा गर्ने यात्रुहरु गरि करिब एक सय जनाले एकै पटक यात्रा गर्न पाउने छन् ।

उक्त बसहरुमा हाल साझामा दिदै आएको सम्पूर्ण सुविधा हुने छ । उक्त बस अपाङ्ग मैत्री हुनेछ । बसमा दुई ढोका हुनेछन् । ‘पछिल्लो ढोका ठूलो हुनेछ र जसले गर्दा अपाङ्गलाई यात्रा गर्न सहज हुन्छ,’ पान्डेयले भने ।

हाल साझाले नयाँ बसपार्कदेखि त्रिभुवन विमानस्थलसम्म ४, नयाँ बसपार्कदेखि लगनखेल बसपार्कसम्म ६ र लगनखेल बस पार्कदेखि बुढानिलकण्डसम्म ६ गरि १६ यातायात सञ्चालन गरिरहेको छ ।