चैत्र ११, २०७२- लोक सेवा आयोगले नयाँ संविधान जारी भएपछि सार्वजनिक संस्थाको सेवा, शर्त, बढुवा र विभागीय कारवाही तथा सुरक्षा निकायका कर्मचारीको बढुवासम्वन्धि मस्यौदा तयार गरेको छ ।

आयोगका अध्यक्ष उमेशप्रसाद मैनालीले मस्यौदा राय सुझाव संकलनमा रहेको जानकारी दिंदै छिट्टै लागू हुने बताए । ‘संविधानको नयाँ व्यवस्था अनुसार आयोगको संगठनात्मक पुनसंरचनाको काम तिब्रताका साथ अघि बढेको छ’, आयोगका पदाधिकारी नियुक्त भएको एक वर्ष पुगेका अवसरमा बिहीवार आयोगमै आयोजित पत्रकार सम्मेलनमा उनले भने ।

निजामति सेवाका लागि कर्मचारी छनौटमा सीमित र केही सुरक्षा निकायमा सहयोगी भुमिका रहेको आयोगको काममा नयाँ संविधानले सार्वजनिक संस्था, सुरक्षा निकायलगायत न्याय सेवातर्फका पदपूर्तीका लागि परीक्षा सञ्चालन गर्ने काम थपिदिएको छ ।

मैनालीले थपिएका संवैधानिक जिम्मेवारी पूरा गर्न आवश्यक कानुन तर्जुमाको प्रक्रिया अघि बढेको उल्लेख गरे । ‘आयोगले आफ्ना भावी सुधार रणनीति पनि नयार पादैछ’, उनले भने, ‘परम्परागत योग्यता परीक्षण विधिले अहिलेको नयाँ चुनौती सामना गर्न नसक्ने महसुस हुँदै गएकोले ज्ञानमा आधारित जाँचलाई व्यक्तिको नेतृत्व क्षमता, समुहका कार्य गर्ने खुबी र सिर्जनशिलता गुणहरु परीक्षण लागु गर्ने गृहकार्य जारी छ ।’