करिब दुई दर्जन युवतीलाई मायाजालमा फसाएर करोडौं ठगेको प्रहरीको अनुमान
नुवाकोटकी २५ वर्षीया रमा लामा (नाम परिवर्तन)लाई जीवन लामा नाम गरेको एक युवकले फेसबुकमा ‘फ्रेन्ड रिक्वेस्ट’ पठाए।
फेसबुकमा पठाएको अनुरोध नस्विकारुन्जेल उनलाई बारम्बार साथी बनाउन फेसबुक मार्फत एसएमएस आइरह्यो।
छिमेकमा रहेका भद्रभलाद्मीको समेत नाम लिएर रमालाई समेत चिनेको भनेर एसएमएस गरेपछि उनले फेसबुकमा साथी बनाइन्।
फेसबुकमा रहेको जीवनको फोटो आकर्षक थियो भने शरीर पनि खाइलाग्दो। उसले अमेरिकी आर्मीको युनिफर्म लगाएर हातले बन्दुक समातेको फोटो फेसबुकमा राखेको थियो।
सेतोपाटीसँग कुरा गर्दै रमाले भनिन्, ‘म फेसबुक फोटो र प्रोफाइल देखेर प्रवाभित भएँ, कुराकानी बाक्लिदै गयो।’
केहि समयको फेसबुक बार्तापछि जीवनले रमालाई विवाहको प्रस्ताव गरे। उनले आफू अमेरिकन आर्मी भएको र विवाह गरेर रमालाई पनि अमेरिका ल्याउने प्रस्ताव गरे। रमा पनि अमेरिका जाने मोहमा जीवनसँग विवाह गर्न राजी भईन्। फेसबुकमा साथी बनाएको १ महिनापछि जीवन रमाको घर नुवाकोट नै पुगे। उनका बाबुआमा र आफन्तलाई भेटे।
अमेरिकन आर्मीलाई छोरी दिन बाबुआमा र आफन्त पनि राजी भए।
दुई महिना बिहे गर्ने आश्वासन दिएर काठमाडौं आएका जीवनले दुई दिनपछि रमालाई फोन गरे।
आफन्तलाई अपर्झट मुटुको बिमार लागेकोले ५ लाख पैसा चाहिएको बताए। आफूसँग अमेरिकन बैंकमा पैसा भए पनि तत्काल निकाल्न नमिलेको भन्दै छट्पटिए। ‘कहिँबाट पैसा व्यवस्था हुनसके केहि दिन भित्र पैसा निकालेर ब्याजसहित फर्काइदिने थिएँ,’ उनले रमालाई भने।
‘हुनेवाला’ श्रीमानको अप्ठ्यारो रमाले बाबु-आमालाई सुनाइन्। अमेरिकन लाहुरे त्यही पनि हुनेवाला ज्वाइँलाई अप्ठ्यारो परेपछि सघाउन रमाका आमाबुबा तयार तत्काल भए। बुबाआमाले सहकारीबाट ३ लाख निकाले। आफन्तबाट २ लाख खोजेर जीवनलाई आइएमइमा हालिलिए।
रमाले जीवनलाई रकम पठाइदिएपछि जीवन एकाएका सम्पर्कविहिन भए। सधै फेसबुकमा च्याट गर्ने जीवन सधै अफलाइन मात्र देखिन्थे। जीवन ‘सम्पर्कबिहिन’ भएको पर्सिपल्ट रमालाई उसको मोबाइल नम्बरबाट फोन आयो, ‘म प्रहरी हवल्दार बोलेको, यो मोबाइल बोक्ने मान्छे ककनीको डाँडाँबाट खसेर मर्यो।’
रमाले केही भन्न नपाउँदै उसले थप्यो, ‘तपाईँको नम्बर यो मोबाइलमा सेभ रहेछ त्यही भएर फोन गरेको, उसको घरमा पनि जानकारी गराइदिनुहोला।’
जीवनले उसको मोबाइल आफ्नै औंलाको निसानाले मात्र खुल्छ भनेर पहिले रमालाई देखाएको थियो। रमाले त्यही भएर ‘प्रहरी हवल्दार’ को कुरा पत्याइनन्। जीवनले रकम हात पारे पछि टाढिन र धोका दिन खोजेको निष्कर्ष रमाको परिवारले लगायो।
रमाले तत्काल नुवाकोट प्रहरीमा बिस्तृत जाहेरी दर्ता गराईन्। काठमाडौं प्रहरीमा पनि उजुरी दिइन्।
प्रहरीमा यस्तै प्रकृतिबाट ठगिएका उजुरी दिनेमा रमा पहिलो थिइनन्। यसअघि नै चार जना युवतिले आफू त्यसरीनै आफू ठगिएको भन्दै उजुरी दिएका थिए। प्रहरीले सबै युवतीलाई ठग्ने ‘नटवरलाल’ एउटै व्यक्ति हुनसक्ने निष्कर्ष निकाल्यो र अनुसन्धान अघि बढायो।
अनुसन्धानको क्रममा जीवनले बारम्बार सिम परिवर्तन गरेको प्रहरीले थाहा पायो। त्यो बिचमा जीवनले २८ पटकसम्म सिम परिवर्तन गर्यो। प्रहरीले भने जीवनले प्रयोग गर्ने स्मार्ट फोनको ‘आईएमइआइ’ नम्बर पछ्याइरहेको थियो।
अनुसन्धान सुरू गरेको ३ महिनापछि प्रहरीले जीवनलाई पोखराबाट पक्राउ गर्यो।
युवती ठग्नका लागि जीवनले दर्जनौं नक्कली नाम राखेर फेसबुक खोलेको प्रहरी अनुसन्धानबाट खुल्न आएको छ।
जीवन पक्राउ परेपछि नुवाकोट, झापा र रामेछापका १४ जना युवतीले प्रहरीमै पुगेर आफू पनि ठगिएको भन्दै उजुरी दिएका छन्।
‘अहिलेसम्म ४० जना युवतीले फोनमा आफू यसरिनै ठगिएको जानकारी गराएका छन्’ एसएसपी विक्रमसिंह थापाले भने।
‘यी मध्ये ककसलाई जीवनले ठगेको रहेछ हामी अध्यन गर्दैछौ,’ प्रहरीले भन्यो।
युवतीलाई मोहजालमा पारेर जीवनले करोडौं कुम्ल्याएको प्रहरीको अनुमान छ।
जीवन अहिले काठमाडौं प्रहरी भित्र ‘नेपाली चार्ल्स शोभराज’ वा ‘नयाँ चार्ल्स सोभराज’ भनेर चर्चित छन्।
‘चाल्स शोभराज र लामाको महिलालाई मायाजालमा पारेर ठग्ने प्रकृति एउटै छ,’ एसएसपी थापाले भने ‘शोभराज युवतीसँग रकम लिएर तिनै युवतीको हत्या गर्थे, लामा भने आफू नै मरेको नाटक गरि युवतिबाट छुटकारा खोज्थे।’
‘फेसबुकबाट साथी बनाउने, त्यसको पन्ध्र दिन देखि एक महिनाभित्रमा घरमै भेट्न जाने, अभिभावक भेट्ने, विवाहको कुरा गर्ने र कुनै बहानामा रकम फ़ुस्काएर हिड्ने उनको तरिका देखियो।’
आफू युएस आर्मी, हङकङ लाहुरे र ब्रिटिस आर्मी भनेर युवतीहरुलाई विवाहको प्रलोभन दिएर उनले एक करोडभन्दा ठगी गर्ने गरेको एसएसपी थापाले बताए। ठगिने सबै युवतीहरु व्याच्लर लेभलको पढाइ सकेका छन्।
‘लाहुरेसँग विवाह गरेर अमेरिका, बेलायत, हङकङ जाने लोभमा युवतीहरु फसेको देखियो’ एसएसपी थापाले भने।
फेसबुकमा नचिनेका मानिसहरूबाट साथी बन्न आउने अनुरो सँग सचेत रहन एसएसपी थापाले सुझाए।
setopati