फोटो :धरानमा जङ्गली जनावार बँदेलको मासु खुलेआम बेचिँदै । तस्बिर: रत्नप्रसाद आचार्य
रत्नप्रसाद आचार्य
धरानमा खुलेआम बँदेलको मासु बेचिँदै
धरान: तस्करहरुले सुनसरीको चारकोसे जङ्गल क्षेत्रमा आगो लगाएर जङ्गली जनावर तस्करी गर्ने गरेको पुष्टि भएको छ । तस्करहरुले वन क्षेत्रमा आगो लगाएर जङ्गली जनावर बदेल मारेर मासु विक्रि गर्ने गरेका छन् ।
चारकोसे जङ्गल क्षेत्रबाट बदेल, हरिण, मृग र कालिज मारेर तस्करहरुले धरान, इटहरी, तरहरा, चतरा लगायतका बजारहरुमा लगेर विक्रि गर्ने गरेका छन् ।
सुनसरीको ८ हजार ५ सय हेक्टर जमिनमा फैलिएको वन क्षेत्रमा तस्करहरुले आगो लगाएपछि जङ्गली जनावरहरु मारेर प्रति केजी एक हजार रुपैयाँमा विक्रि गर्ने गरेका छन् ।
बुधवार वडा प्रहरी कार्यालय धरान अगाडि र प्रहरी चौकी बरगाछी अगाडि तस्करहरुले ढुक्कले बँदेलको मासु बेचिरहेका का थिए ।
तस्करहरुले हप्तैपिच्छे बँदेलको मासु बचेपछि एक हजार रुपैयाँमा एक किलो बँदेलको मासु किनेर खाएको धरानका विके लिम्बूले बताए । उनले बँदेलको मासु खाँदा मधुमेह लागेका बिरामीलाई असर नगर्ने भएकाले किनेको प्रतिक्रिया दिए ।
कुनै पनि जङ्गली जनावरहरु विना अनुमति घरमा पाल्न नपाइने भएपनि तस्करहरुले मध्यरातमा वन क्षेत्रमा बदेल, मिर्ग, कालिज मारेर धरान, इटहरी, तरहरा लगायतका बजारमा बेच्ने गरेका छन् ।
मंगलवार धरानको भानु चोक र बरगाछीमा बदेलको मासु बेच्दै गरेको अवस्थामा २ जनालाई इलाका वन कार्यालय धरानले पक्राउ गरेको छ ।
वडा प्रहरी कार्यालय धरान अगाडि धरानका बँदेल मारेर एक हजार रुपैयाँले बेच्दै गरेको अवस्थामा जनक श्रेष्ठ र बरगाँछीमा बेच्दै गरेका खड्गबहादुर भण्डारीलाई बँदेलको मासु सहित पक्राउ गरिएको इलाका वन कार्यालय धरानका सहायक वन अधिकृत ज्ञानकुमार लामाले बताए । उनका अनुसार पक्राउ परेका दुबैजनालाई हिरासतमा राखेर अनुसन्धान थालिएको छ ।
तस्करहरुले जङ्गली जनावर र सखुवाका काठ तस्करी गर्ने उदेश्यले लगाएको आगो जिल्ला वन कार्यालय लगायतका सरोकारवाला निकायले समयमा नियन्त्रण गर्न नसक्दा चोरी सिकार बढेको स्थानीयवासिन्दाको आरोप छ ।
सुनसरीको इटहरी र धरान उपमहानगरपालीका क्षेत्रमा पर्ने लाङघाली सामुदायिक वन, बाझगरा सामुदायिक वन, पाँचकन्या सामुदायिक वन, पानमारी सामुदायिक वन, हरियाली सामुदायिक वन, शान्तिनगर सामुदायिक वन र सरस्वती सामुदायीक वन लगायतका दर्जन बढि सामुदायिक वनमा तस्करहरुले जङ्गली जनावार मारेर तस्करी गर्ने गरेको इटहरी शान्तिनगरका पबन अधिकारीले बताएका छन् ।
annapurnapost