सुवालका अनुसार राजकुमारले भूकम्पपीडितको अवस्था र समस्याबारे चासो देखाएका थिए। ‘स–साना कुरा पनि सोध्नुहुन्थ्यो,’ उनले भने, ‘राजकुमार होइन, परिवारकै मान्छेजस्तो लाग्यो।’

यसक्रममा ह्यारीले त्रिपालभित्र छिरेर स्थानीयसँग भलाकुसारी गरेका थिए। लक्ष्मीसुन्दर कोजुको त्रिपालभित्र केही समय बिताएका उनले त्यहाँको अवस्था निकै ध्यान दिएर नियाले, केटाकेटीसँग रमाए। ‘घरमा पाहुना आएजस्तो भयो,’ उनले भने, ‘भित्र रहेका केटाकेटी पनि निकै रमाए।’

राजकुमारले शिविरभित्र करिब २० मिनेट बिताएका थिए। उनले भूकम्प पीडितका समस्यासँगै उनीहरूसँग अन्य प्रसंगमा पनि भलाकुसारी गरेको सुवाल सम्झन्छन्। ‘उहाँले मलाई बाल्यकालको मन पर्ने खेल सोध्नुभयो,’ उनले भने, ‘मैले गुच्चा भन्दा उहाँ मुस्कुराउनुभयो।’ पछिल्लो समय आफू फुटबलको फ्यान रहेको सुनाउँदा राजकुमारले आफूलाई पनि फुटबल मन पर्ने बताएको उनले सुनाए।

शिविरमा रहेका ६० परिवारले गच्छेअनुसार राजकुमारलाई अतिथि–सत्कार गरेका थिए।

त्यसपछि राजकुमार भक्तपुर दरबारक्षेत्रतिर लागे, बाटो देखाउने उनै सुवाल। यो सान्निध्यले सुवाल पनि देशी–विदेशी सञ्चारकर्मीको क्यामरामा कैद भए। तस्बिर खिच्दाको चमकले राजकुमारसँगै उनको मुहार पनि उज्यालो देखिन्थ्यो। सुवालले राजकुमारलाई भक्तपुरका क्षतिग्रस्त सम्पदाबारे बेलीविस्तार लगाए। ‘उहाँले कति सम्पदा क्षति भयो भनेर सोध्नुभयो,’ उनले भने, ‘मैले आफूलाई जानकारी भएजति सबै बताएँ।’ भत्केका मन्दिरबारे जानकारी लिएका राजकुमारले तिनीहरूको ऐतिहासिक पक्षबारे पनि चासो देखाएका थिए।

दर्जनौं पत्रकारका सयौं ‘क्लिक’ भोगेका सुवाललाई राजकुमारसँग सेल्फी खिचाएको क्षण सबैभन्दा प्रिय लागेको छ। ‘मोबाइलमा उहाँ र मेरो तस्बिर छ,’ उनले खुसी हुँदै भने, ‘यही तस्बिर मेरो र राजकुमारको मित्रताको साक्षी हुनेछ।’

राजकुमारलाई नमस्ते गर्दै स्वागत गरेका सुवाललाई फर्कने बेला उनले पनि ‘नमस्ते’ भन्दै बिदा मागे। आमा साइली सुवाल र दिदीसहित शिविरमा बस्दै आएका सुवाल राजकुमारसँगको करिब आधा घन्टाको सामीप्यमा उनलाई निकै सरल व्यक्तिका रूपमा पाएको बताउँछन्।

राजकुमार जानेबित्तिकै अधिकांश सञ्चारकर्मीको घेरामा परेका उनी केही समय जवाफ दिन भ्याइ–नभ्याइ रहे। सबैको जिज्ञासा उनले राजकुमारसँग बिताएका क्षणबारे केन्द्रित थियो। त्यसपछि उनी फेरि स्थानीयको घेराउमा परे। उनीहरूसँग केही बेर भलाकुसारी गर्दै उनी कक्षा ८ को परीक्षा तयारी गर्नु छ भन्दै शिविरतर्फ लागे।

भक्तपुरमा ‘ओइ हरि’

सामान्य पहिरनमा आएका अन्य पर्यटकजस्तै देखिन्थे ह्यारी। त्यसैले भक्तपुरका सर्वसाधारणले उनलाई राजकुमार भनेर झट्टै ठम्याउन सकेनन्। सुरक्षाकर्मीको बाक्लो उपस्थितिका कारण कुनै विशिष्ट व्यक्ति आउने अड्कल भने धेरैले काटिसकेका थिए।

राजकुमार नजिकै आउँदै गर्दा चिनेका पर्यटकले उनलाई ‘हाई ह्यारी’ भन्दै चिच्याए। त्यसअघिसम्म अन्जानजस्तै रहेका केही सर्वसाधारण उनीहरूकै स्वरमा स्वर ‘ओइ हरि’ बोलाउँदै थिए।

‘पर्यटकले ह्यारी भन्दा स्थानीयले हरि सुने,’ कमलविनायकबाट आएकी सुनीता अवालले भनिन्, ‘त्यसैले सर्वसाधारण पनि ‘ओइ हरि’ भन्दै चिच्याउन थाले।’ राजकुमारलाई हेर्न युवा–युवती, महिला बालबालिका र पर्यटकको भिड लागेको थियो।

काठमाडौं ओर्लेपछि उच्चस्तरीय भेटघाट र अवलोकन भ्रमणमा व्यस्त राजकुमार आइतबार बिहान पाटन दरबार स्क्वायर पुगेका थिए। उनले त्यहाँ काठ खोप्ने काम गर्नुका सार्थै ढुंगाका मूर्ति र कलाकृति ध्यान दिएर नियालेका थिए। राजकुमार आइतबार भक्तपुरस्थित भूकम्पपीडित शिविर पुग्नुअघि त्यहाँस्थित रेडक्रस कार्यालयसमेत पुगेका थिए।