फोटो :विराटनगरमा पक्राउ परेका इटहरी ४ का विश्वराज श्रेष्ठ शरीरमा आफूले बाँधेर ल्याउँदै गरेको लागूऔषध देखाउँदै ।
विराटनगरः कारोबारीहरुले पछिल्लो समयमा आफ्नै शरीरमा फिटिङ गरेर कानुनद्धारा बर्जित लागूऔषध ओसारपसार गर्ने गरेको पाइएको छ ।
भारतको जोगवनीमा किनेर आफ्नै शरीरमा लागूऔषध टेपले बाँधेर फिट गरेपछि कारोवारी नेपाल भित्रने गरेको प्रहरीले जनाएको छ । शरीरको अगाडि देखि पछाडिको भाग सम्म टेपले बाँधेर लागूऔषध ल्याउँदै गरेको अवस्थामा विराटनगरबाट शुक्रबारराति एक युवा पक्राउ परेपछि लागूऔषध कारोवारीले अपनाउन थालेको नयाँ उपाय पत्ता लागेको हो ।
प्रहरीले विराटनगर १५ स्थित होटेल गीताञ्जली रेष्टुरेन्ट अगाडि हिंडिरहेको अवस्थामा भारतको जोगवनीबाट ठूलो परिणामको लागूऔषध लिएर आएका इहटरी ४ का २५ वर्षीय विश्वराज श्रेष्ठलाई राति ८ बजे पक्राउ गरेको छ ।
जोगनवीबाट लागूऔषध लिएर आएका उनी इहटरीतर्फ जाँदै गर्दा प्रहरी फन्दामा परेका हुन् । पक्राउ परेका श्रेष्ठ लामो समयदेखि जोगनवीबाट लागूऔषध ल्याएर पूर्वका विभिन्न ठाउँ सम्म लगेर विक्री गर्ने धन्दामा संलग्न रहेको प्रहरीले पत्ता लगाएको छ ।
उनी विरुद्ध लागूऔषध ओसारपसार सम्बन्धी मुद्धा चलाउन थप अनुसन्धान सुरु गरिएको प्रहरीले जनाएको छ । वडा प्रहरी कार्यालय विराटनगरका प्रहरी निरीक्षक किशोर लम्सालका अनुसार श्रेष्ठका साथबाट लुपिजेसिक, डाइजेल्याब र एभिल गरेर ६९ थान लागूऔषध बरामद गरिएको छ ।
‘प्रहरीले गरिरहेको नियमित चेकजाँचका क्रममा श्रेष्ठको शरीर अस्वभाविक देखिएपछि खानतलासी गरिएको थियो,’ लम्सालले भने, ‘खानतलासी गर्ने क्रममा उनले शरीरको आगडिदेखि पछाडि सम्मनै सेतो सेलो टेपले बाँधेको अवस्थामा लागूऔषध फेला परेको हो ।’
‘शरीरमा बाँधेर लगाएको कपडाले छोपेपछि प्रहरीले थाहा नपाउने अनुमान गर्दै कारोवारीले शरीरमा बाँधेर लागूऔषध ओसारपसार गर्ने गरेको पाइयो,’ उनले भने, ‘राति र दिउँसो जुनसुकै समयमा भएपनि शंकास्पद अवस्थाका सबैलाई नियन्त्रणमा लिएर खानतलासी सुरु गरिएको छ ।’
प्रहरीले लागूऔषध धमाधम भित्रन थालेको सूचना पाएसंगै सबै ठाउँमा कडाई गरिएको नजाएको छ । यस अघि कारोवारीले सवारी साधनको प्रयोग गरेर लागूऔषध भित्राउँदै आएका थिए । लम्सालका अनुसार प्रहरीले सवारी साधनमा हुने गरेको ओसारपसारमा कडाई थालेसंगै कारोवारीले शरीरमा फिटिङ गरेर भित्राउन थालेको पाइएको हो ।
annapurnapost
