क्रान्ति शाह
फोटो :सन्तोषको हत्या अभियोगमा पक्राउ उनकी प्रेमिका निभा साह कलवार (कालो पछयौरी ओढेकी ) । तस्बिर: क्रान्ति शाह
वीरगन्जः प्रेमिका निभाको अर्कैसँग विहेका लागि टिकाटालो भएको खबरले तनावमा परेका बाराको कलैयाका सन्तोष साह मंगलबार राति सिन्दूर पोते लिएर मङगलबार मध्यराति प्रेमीकाको घरमा पुगे ।
छतमा कुरेर बसेका प्रेमी सन्तोषलाई भेट्न उनकी प्रेमिका निभा पनि छतमा पुगिन् । सन्तोषले सिउँदोमा सिन्दूर र गलामा पोते हाल्न खोज्दा निभाले मानिनन् ।
आफ्नो विहे अर्कै केटासँग हुने पक्का भइसकेको भन्दै निभाले जबरजस्ती नगर्न प्रेमी सन्तोषलाई अनुरोध गरिन् । तै आफ्नी प्रेमिका अर्कैकी हुने खबरले तनावमा परेका उनले मान्दै मानेनन्
दुवैजनाबीच भनाभन भएको थाहा पाएर निभाका बुवा, आमा र भाइ पनि छतमा पुगे । उनीहरुले सन्तोषलाई जबरजस्ती घर भित्र लगे । नाइनलको डोरीले घाँटी कसेर उनीहरुले सन्तोषको हत्या गरिदिए ।
निभाका परिवारका सदस्यहरुले सन्तोषको शव बुधबार पनि दिनभर घरैमा राखे । बुधबार मध्यरातमा उनीहरुले घर नजिकैको बकुल्ला बारीमा लगेर शव फालिदिए ।
बिहीबार बिहान खेतमा शौच गर्न गएका स्थानीय महिलाले युवकको शव देखेपछि प्रहरीलाई खबर गरे । घटनास्थलमा बिहीबार बिहान पुगेको प्रहरीले शव नियन्त्रणमा लिएर अनुसन्धान शुरु ग¥यो ।
अनुसन्धानका क्रममा सन्तोषको हत्यामा उनकै प्रेमिका निभा र उनका अभिभावकहरुको संलग्नता रहेको खुलेपछि प्रहरीले बिहीबार साँझ नै निभासहित चार जनालाई पक्राउ गर्यो ।
पक्राउ परेका सन्तोषकी प्रेमिका कलैया–४ निवासी २० वर्षीय निभाकुमारी जयसवाल, उनका बुवा ४९ वर्षीय शिवप्रसाद साह कलवार, आमा ४५ वर्षीया सुमित्रादेवी साह कलवार र भाइ १८ वर्षीय कन्हैयाकुमार साह कलवारलाई प्रहरीले शुक्रबार सार्वजनिक गरेपछि सन्तोषको हत्याको कारण प्रेमसम्बन्ध भएको तथ्य खुलेको हो ।
प्रेम सम्बन्धमा परेकै कारण कलैया नगरपालिका–६ का २६ वर्षीय युवक सन्तोष साहको हत्या भएको बाराका प्रहरी नायव उपरीक्षक विनोद शर्माले बताए ।
निभा र सन्तोषबीच करिब ती वर्षदेखि प्रेम सम्बन्ध रहेको थियो । तर निभाका अभिभावकले अर्कै केटासँग बिहे गर्नका लागि टिकाटालो गरेको थाहा पाएपछि सिन्दूर पोते लिएर निभासँग जबरजस्ती विवाह गर्न उनकोे घरमै पुगेका सन्तोषलाई निभाका परिवारले हत्या गरेको प्रहरी नायव उपरीक्षक शर्माले बताए ।
निभाका परिवारले सन्तोषको घाँटीमा नाइलनको डोरी कसेर हत्या गरेक दिन घरै राखेपछि बुधबार रातको समयमा घर नजिकैको बकुल्ला घारीमा लगेर शव फालेको प्रहरी नायव उपरीक्षक शर्माले बताए ।
पक्राउ परेका सन्तोषकी प्रेमिका निभासहित चारैजनालाई कर्तव्य ज्यान मुद्दामा म्याद थप गरी अनुसन्धान भइरहेको प्रहरी नायव उपरीक्षक शर्माले बताए ।
प्रहरीले सन्तोषले प्रयोग गर्ने सिमकार्डसहितको मोबाइल र हत्या गर्न प्रयोग गरिएको नाईलनको डोरीसमेत निभाको घरबाट बरामद भएको जनाएको छ ।
बीटीएस र पोलिग्राफ प्रविधिबाट घटनाको अनुसन्धान गर्दा शव फेला परेको करिब तीन घण्टामै हत्यारालाई पक्राउ गर्न सफल भएको शर्माले बताए ।
पक्राउ परेका युवतीका परिवारका सदस्यहरुले आफूहरुले नै सन्तोषको हत्या गरेको स्वीकारिसकेको प्रनाउ शर्माले बताए ।
annapurnapost