चैत्र ३, २०७२- कांग्रेसका नवनिर्वाचित सभापति शेरबहादुर देउवाले आफ्ना प्रतिस्पर्धी रामचन्द्र पौडेलसहित ६ जनालाई बुधबार केन्द्रीय कार्यसमिति सदस्यमा मनोनीत गर्ने भएका छन् ।
कांग्रेस महाधिवेशन सम्पन्न गर्न गठित केन्द्रीय निर्वाचन समितिले देउवासहित कार्यसमितिमा चयन भएका ६४ जनालाई बुधबार अपराह्न निर्वाचित भएको प्रमाणपत्र दिने कार्यक्रम छ ।

कार्यक्रमपछि देउवाले पौडेललाई कार्यसमितिमा आफूपछिको दोस्रो वरीयताक्रममा रहने गरी सदस्य मनोनीत गर्ने जानकारी स्रोतले दिएको छ । कांग्रेसमा त्यसरी दोस्रो वरीयताक्रममा राखिने नेतालाई ‘वरिष्ठ नेता’ भन्ने परम्परा छ ।

देउवाले बुधबारै प्रतिस्पर्धी पौडेलका अतिरिक्त सभापतिका अर्का उम्मेदवार कृष्ण सिटौला र महामन्त्रीमा पराजित अर्जुननरसिंह केसी, गगन थापा, कोषाध्यक्षमा पराजित चित्रलेखा यादव र उमाकान्त चौधरीलाई केन्द्रीय सदस्यमा मनोनीत गर्नेछन् ।

सभापति देउवाले ६ महिनाभित्रै पार्टीका सबै भ्रातृ संगठनको अधिवेशन गराउने भएका छन् । तेह्रौं महाधिवेशनपछि बस्ने कांग्रेस केन्द्रीय समितिको पहिलो बैठकले देउवाको प्रस्तावमा ६ महिनाभित्रै सबै भ्रातृ संगठनको अधिवेशन गराउने निर्णय गर्ने स्रोतले बतायो । नेविसंघ, तरुण दललगायत भ्रातृ संगठनको अधिवेशन वर्षौंदेखि हुन सकेको छैन ।