२ चैत, काठमाडौं । उपत्यकाको चक्रपथमा अत्याधुनिक प्रसारण लाइन बनाउन चीनसँग नेपाल सरकारले करिब ६ अर्ब रुपैयाँको सहयोग माग्ने प्रस्ताव तयार पारेको छ ।
प्रधानमन्त्री केपी शर्मा ओलीको चीन भ्रमणका बेला रिङरोडमा प्रसारण लाइन निर्माणका लागि सहयोगको आग्रह गर्न उर्जा मन्त्रालयले यस्तो प्रस्ताव तयार पारेको हो ।
उपत्यकाको विद्युत वितरण प्रणालीलाई व्यवस्थित गर्न रिङरोडको दुबैतर्फ मनोपोल -एउटामात्रै पोल) भएको प्रसारण लाइन निर्माण गर्ने मन्त्रालयको प्रस्तावमा उल्लेख छ ।
चक्रपथमा स्थापना गरिने सो प्रसारण लाइनको क्षमता १३२ केभीएको हुनेछ । अहिले बिजुलीका पोलहरु व्यवस्थित हुन नसक्दा काठमाडौं उपत्यकामा विद्युत वितरणमा समस्या उत्पन्न हुनुका साथै सडकसमेत व्यवस्थित हुने सकेको छैन ।
यसलाई व्यवस्थित गर्न आधुनिक प्रसारण लाइनको आवश्यकता परेको उर्जा मन्त्रालयका प्रवक्ता डा. सञ्जय शर्माले अनलाइनखबरलाई बताए । शर्माका अनुसार रिङरोडमा प्रस्ताव गरिएको वितरण लाइनमा तीन वटा सबस्टेसन र ३ वटा ठूला ट्रान्सर्फमर रहनेछन् ।
यो आयोजना सम्पन्न गर्न ५८ मिलियन अमेरिकी डलर अर्थात करिब ५ अर्ब ८० करोड रुपैयाँको हाराहारी खर्च लाग्ने प्रारम्भिक अनुमान गरिएको छ । ‘यो वितरण लाइन निर्माणका लागि चीनसँग अनुदान लिने वा सहुलियतदरको ऋण लिने भन्ने विषय अर्थ मन्त्रालयको हो,’ शर्माले भने ।
अहिले नेपाल विद्युत प्राधिकरणले विश्व बैंकको सहयोगमा काठमाडौं उपत्यकाको विद्युत वितरण लाइनको सुधार आयोजना सञ्चालन गरिरहेको छ ।
onlinekhabar