फोटो :सिंगटी बजारमा पुनर्निर्माण प्राधिकरणको कार्यक्रममा अवरोध गर्दै स्थानीय । तस्बिर: सुवास योञ्जन
दोलखामा कार्यक्रम नै हुन सकेन
दोलखाः वैशाख १२ को भूकम्पपछि क्षतिग्रस्त भएका सर्वसाधरणको घर पुनर्निर्माण शुभारम्भ कार्यक्रममा दोलखाका स्थानीयबासीले अवरोध गरेका छन् ।
दोलखाको सिंगटी बजारबाट थाल्न लागिएको पुनर्निर्माण प्राधिकरणको पुनर्निमाण अभियानमा स्थानीयबासी र रजानीतिक दलले अवरोध गरेका हुन् ।
प्राधिकरणका प्रमुख सुशील ज्ञवालीसहितको टोलीले लामीडाँडा–६ र लादुक–८ का १०÷१० परिवारलाई घर बनाउने पहिलो किस्ताको रकमको सम्झौता गर्ने कार्यक्रम थियो ।
प्राधिकरणले तथ्यांक विभागले संकलन गरेको तथ्यांकका आधारमा रकम बाँड्ने तयारी गरेपछि स्थानीयले भने परिचयपत्रका आधारमा बाँडिनुपर्ने भन्दै विरोध जनाएका हुन् ।
प्राधिकरणले राजनीतिक दलहरुलाई उपेक्षा गरेर एकलौटी कार्यक्रम गर्न खोजेको भन्दै कार्यक्रम भइरहेकै बेला एकीकृत माओवादीका युवा नेता विशाल खड्काले मञ्चमै गएर तत्काल कार्यक्रम रोक्न आग्रह गरेका थिए ।
उनले मञ्चमै गएर दलहरुलाई उपेक्षा गरि रकम बाँडिए प्रतिकारमा उत्रिने चेतावनी दिएपछि कार्यक्रम नै अवरुद्ध भएको छ ।
कार्यक्रममा नयाँ शक्ति नेपालका दोलखा संयोजक रविन्द्र कार्कीले दलहरु र जनताको सहमति विना प्राधिकरणले एकपक्षीय काम गरेको भन्दै आपत्ति जनाए ।
दलहरु र स्थानीयबासीले अवरोध गरेपछि प्राधिकरणका प्रमुख ज्ञवाली अहिले छलफलमा जुटेका छन् ।
उनले आफूहरुले जबरजस्ती काम गर्न नखोजेको बताउँदै पुनर्निर्माणको काम पनि अघि बढाउने र समस्याहरुको पनि समाधान गर्ने सोचका साथ अभियान सुरु गर्न लागेको बताएका थिए ।
प्राधिकरणे घर बनाउने रकमको पहिलो किस्ताका लागि गाविस सचिव र २० जना घरधनीबीच सम्झौता गर्ने तयारी गरेको थियो ।
तर स्थानीयबासीले सबै भूकम्पपीढिडतलाई परिचयपत्र नपाएसम्म रकम लिँदैनौ भनेपछि कार्यक्रम नै रोकिएको हो ।
कार्यविधि तोकिएका केही व्यक्ति रकम लिन तयार भएपनि दल र अन्य स्थानीयले चर्को विरोध गरेपछि प्राधिकरणलाई पहिलो गाँसमै ढुंगो लागेको हो ।
भूकम्प जानुअघि एउटै घरमा बसेका पाँच परिवारले अहिले अलग अलग घर बनाउन खोजेका छन् । तर प्राधिकरणले एउटै मात्र घर बनाउन रकम दिने जनाएपछि स्थानीय झनै आक्रोशित भएका हुन् ।
‘भूकम्पअघिको संयुक्त परिवार अहिले चारतिर छरिएर बसेको छ’, लामीडाँडा गाविस–५ का भवानी पाठकले भने, ‘परिचयपत्रका आधारमा रकम चाहिन्छ, कार्यविधि र लालपूर्जाका आधारमा रकम लिँदैनौं ।’
annapurnapost