फोटो :जनकपुरमा पत्रकारसँग बोल्दै मन्त्री मण्डल । तस्बिर:मनिका झा
राजाको चाकडी गर्नेले मधेसीलाई मुर्ख बनाए
जनकपुरधामः युवा तथा खेलकुद मन्त्री सत्यनारायण मण्डलले मधेसवादी दलका नेताहरुको दिमागमा भाईरस पसेकोले उनीहरु अहिलेको संविधानको विरोध गरिरहेको बताएका छन् ।
शनिबार जनकपुरमा पत्रकारहरुसँग कुराकानी गर्दै मन्त्री मण्डलले मधेस आन्दोलन यहाँका सामन्तवादी, जमिनदारहरुले आफ्नो बर्चस्व बचाउन गरेको आरोप लगाएका छन् ।
‘आफ्नो पहिचान मधेसबाट लोप हुने खतरा देखेपछि पहिला राणाको र पछि राजाको चाकरी गरेकाहरु अहिले मधेसका जनतालाई मुर्ख बनाएर मधेसका मसिहा बन्न लागि परेका छन्’, उनले भने ।
मधेसमा एमालेबारे नकारात्मक प्रचारवाजी गरिएपनि ती कुरा धेरै दिन नटिक्ने बताउँदै उनले मधेसका समर्थक र विरोधी आफैं छुट्टिने बताए ।
संविधान संशोधन गरेर वर्तमान सरकारले वार्ता र छलफलको मार्ग प्रशस्त गरेपनि आफ्नो जिद्दी र अनावश्यक ढिपी छाड्न नमानेर मधेसवादी दलका नेताले विवाद बढाएको उनको भनाइ थियो ।
उनले खेलकुदको विकासका लागि वर्तमान सरकार गम्भीर रहेको बताउँदै यस क्षेत्रमा प्रतिभावान खेलाडी बढाउन पूर्वाधार विकासमा उचित बजेट विनियोजन गरिने जानकारी दिए ।
मण्डलले यस क्षेत्रमा खेलकुद विकासका लागि अन्तर्राष्ट्रियस्तरको रंगशाला निर्माणको माग धेरै पहिलादेखि हुँदै आएको अवस्थामा आफ्नो कार्यकालमा रामजानकी रंगशाला बनाउन सक्दो प्रयास गर्ने बताए ।
annapurnapost