प्रधान न्यायाधीश कल्याण श्रेष्ठले देशको शिक्षा नीतिले पेट पाल्ने जनशक्ति उत्पादन गरेपनि मुलुकको आवश्यकता धान्ने खालको नरहेको बताउनुभएको छ ।
पद्मोदय पूर्वविद्यार्थी सङ्घले विद्यालयको ७०औँ वार्षिकोत्सवका अवसरमा आज यहाँ आयोजना गरेको कार्यक्रमलाई सम्बोधन गर्दै उहाँले राज्यले शिक्षामा गरेको लगानीको सन्तोषजनक रुपमा प्रतिफल आउन नसकेको धारणा व्यक्त गर्नुभयो ।
उहाँले भन्नुभयो– “हाम्रो शिक्षामा भएको सम्पूर्ण लगानी विदेशी विश्वविद्यालयमा पढ्न जाने तयारीका लागिमात्र भएको छ यहाँ उत्पादन भएका सक्षम जनशक्ति बाहिर गएबाट प्रतिभासँगै पुँजी पनि पलायन भएको छ । सरोकारवालाले यस कुरामा विशेष ध्यान पु¥याउन आवश्यक छ ।”
समारोहमा वरिष्ठ गायक प्रेमध्वज प्रधानलाई पद्मोदय सम्मान प्रदान गरिएको थियो ।
कार्यक्रममा प्रवेशिका परीक्षामा उच्चतम् अङ्क ल्याउने छात्रछात्रालाई नगद पुरस्कार र प्रशंसापत्र प्रदान गरियो । त्यस अवसरमा सो विद्यालयमा अध्ययनरत उच्चतम अङ्क ल्याउने एक दलित विद्यार्थीलाई पनि नगद पुरस्कार प्रदान गरिनुका साथै विद्यालयमा उत्कृष्ट काम गर्ने शिक्षकशिक्षिका र कर्मचारीलाई पनि नगद पुरस्कार प्रदान गरिएको थियो ।
समारोहमा पूर्वविद्यार्थी सङ्घका अध्यक्ष हेमन्त खरेलले पद्मोदयबाट उत्पादित जनशक्ति मुलुकमा हरेक विधामा अब्बल सावित भएको बताउनुभयो ।
रासस
