तिलोत्तमा
स्वास्थ्य सचिव शान्तबहादुर श्रेष्ठले नयाँ स्वास्थ्य ऐनमा स्वास्थ्य बिमा लागू गर्ने तयारी सरकारले गरेको बताउनुभएको छ ।
अहिले स्वास्थ्य सेवा अत्यधिक महँगो र पहुँचवालाको मात्र भएकाले सर्वसाधारणका लागि पनि स्वास्थ्य सहज हुनका लागि ऐनमा नै स्वास्थ्य बिमा लागू गर्ने तयारी सरकारले गरेको उहाँले बताउनुभयो ।
आज बुटवलमा नेपाल औषधि व्यवसायी लुम्बिनी अञ्चलको शाखाको नवाँै अधिवेशनको उद्घाटन कार्यक्रममा बोल्दै सचिव श्रेष्ठले स्वास्थ्य क्षेत्र पुरानै शैलीबाट सञ्चालन भएका कारण अब पुनःसंरचनाका साथ लागू गर्ने तयारी भएको बताउनुभयो । उहाँले नेपाल औषधि उत्पादनमा आत्मनिर्भर नबन्दा विदेशबाट आयात गर्दा औषधिको गुणस्तरमा कमी भएको समेत बताउनुभयो ।
उहाँले गाउँदेखि सहरसम्म बिनादर्ता सञ्चालनमा आएका औषधि पसलले बिरामीको स्वास्थ्यमाथि खेलवाड नगर्न आग्रहसमेत गर्नु भएको छ । यदि त्यस्ता औषधि पसलले बिरामीलाई औषधि दिने गरेमा स्वास्थ्य मन्त्रालयले कडा कारबाही गर्ने उहाँले बताउनुभयो ।
औषधि व्यवस्था विभागका महानिर्देशक बालकृष्ण खकुरेलले सरकारी अस्पतालका डाक्टर निजी क्लिनिकमा पैसाका लागि जानु पेसाको धर्म विपरीत भएको बताउनुभयो ।
उहाँले निजी औषधि कम्पनीले डाक्टरलाई आर्थिक कमिसनको प्रलोभनमा पारेर गुणस्तरीय औषधि सिफारिस नगर्नेसमेत आग्रह गर्नुभएको छ । औषधि व्यवसायीको समस्यालाई मध्यनजर गर्दै प्रत्येक क्षेत्रमा औषधि व्यवस्था विभागको शाखा कार्यालय खोल्ने तयारी भएको बताउनुभयो ।
कार्यक्रममा डा भगवान कोइरालाले चिकित्सक आफ्नो पेसाप्रति इमान्दार बन्न आग्रह गर्नुभयो ।
उद्घाटन कार्यक्रममा औषधि व्यवसायी सङ्घका केन्द्रीय अध्यक्ष मृगेन्द्रमेहर श्रेष्ठले नेपालमा औषधि उत्पादनमा आत्मनिर्भर बनाउन नीतिगत रुपमा सरकारले सहयोग गर्नुपर्ने माग गर्नुभयो । कार्यक्रममा डा भगवान कोइरालालाई चिकित्सा क्षेत्रमा उल्लेखनीय सेवा पु¥याएबापत सम्मान गरिएको थियो ।
रासस
