फाल्गुन २९, २०७२- कांग्रेस नेता रामचन्द्र पौडेलले अहिले दोस्रो ठूलो पार्टीले सरकारको नेतृत्व गरिरहेको भन्दै सरकारले राम्रो काम गरुन्जेल कांग्रेसले सरकारकामा जान हतार गर्न नहुने बताएका छन् ।

चितवनमा प्रेस युनियनले आयोजना गरेको भटघाट कार्यक्रममा बोल्दै नेता पौडेलले कांग्रेसको प्रथमिकतामा सरकार नभएको बताए ।

राजधानीमा भर्खरै सकिएको कांग्रेसको १३ औं महाधिवेशनमा सभापति पदमा शेरदबहादुर देउवाबाट पराजित भएका पौडेलले प्रजातन्त्रमा जित र हार सामान्य भएको टिप्पणी गर्दै पार्टी एकता नै आफ्नो प्रमुख प्राथमिकता रहेको बताए ।

‘प्रजातन्त्रमा धेरैमध्येमा एकले जित्ने हो’, पौडेलले भने,‘सभापतिमा पनि हाम्रै एक जना साथीले जित्नु भएको छ ।’

उनले पार्टीमा अब भागभण्डाको आधारमा नभई क्षमता र महत्वका आधारमा मूल्यांकन हुनुपर्ने बताए । उनले पार्टी बलियो भए मात्रै पार्टीका नेता बलियो हुने धारणा राखे ।

उनले सभापति पदमा पराजित भएपनि पार्टीलाई एकताबद्ध र बलियो बनाउन आफू लागिपर्ने बताए ।