फाल्गुन २६, २०७२- नेपाली कांग्रेसका नवनिर्वाचित महामन्त्री शशांक कोइरालाले ‘हाम्रो प्रजातन्त्रको मुहान तराईमा असन्तुष्टि छ’ भन्दै सहमति सहकार्य र समझदारीमा जोड दिएका छन् ।

महामन्त्री निर्वाचित भएपछि मतदातालाई धन्यवाद दिँदै प्रकाशित गरेको विज्ञप्तिमा उनले यस्तो बताएका हुन् । उनले आफूलाई मत दिने सबैलाई धन्यवाद भन्दै महाधिवेशन र निर्वाचनले पार्टीमा नयाँ रक्त संचार गरेको बताएका छन् ।

‘आजको अपरिहार्यता राष्ट्रियता, प्रजातन्त्र र प्रजातान्त्रिक समाजवादमा आधारित सामाजिक न्याय हो,’ उनले भनेका छन् ।

अर्जुननरसिंह र गगनको पनि मतदातालाई धन्यवाद
महामन्त्रीमा पराजित भएका अर्जुननरसिंह केसी र गगन थापाले पनि विज्ञप्ति प्रकाशित गरी मतदातालाई धन्यवाद दिएका छन् । अर्जुननरसिंहले विजय पाएकाहरुलाई बधाई दिँदै आउने दिनमा पार्टीलाई एकजुट बनाएर अघि बढाउन आग्रह गरेका छन् ।

गगनले पनि निर्वाचित पदाधिकारहरुले सबैको भावना समेटेर अघि बढाउने विश्वास व्यक्त गरेका छन् । उनले भनेका छन्, ‘नेपाली काँग्रेस पार्टीलाई २००७ सालको जस्तो क्रान्तिकारी र २०१५ सालको जस्तो प्रगतिशील बनाउँदै परिवर्तित युगको हाँकलाई स्वीकारेर नेपाललाई सम्मानित र समुन्नत नेपाली बस्न सक्ने विलक्षण विविधताले युक्त समुन्नत घर वनाउने आधारशीला खडा गर्न र नेपाली काँग्रेसलाई समावेशी लोकतन्त्रलाई संस्थागत गरेर मूलुकलाई समुन्नतिमा लैजाने अभियानको नेतृत्व गर्ने पार्टी बनाउन पार्टी पुनर्निर्माणको मेरो अभियान जारी रहनेछ । यस अभियानमा निरन्तर साथ र सहयोगको अपेक्षा गरेको छु ।’

शशांक कोइरालाको विज्ञप्ति

गगन थापाको विज्ञप्ति