मतदान गर्ने स्थल सभागृहमा जडित सीसी क्यामेरा । अंगद ढकाल/कान्तिपुर
घिमिरेका अनुसार धनुषा-५ मा क्षेत्रीय निर्वाचन हुन नसकेकाले ३ हजार १ सय ६१ मतदाता छन् । तात्कालिन सभापति सुशील कोइरालाले मनोनित गरेका ३० जना महाधिवेशन प्रतिनिधिले मत दिन पाउने/नपाउने भन्नेमा निर्णय हुन बाँकी छ । मनोनीतले मत दिन पाएमा मतदाता ३ हजारा १ सय ९१ पुग्ने जानकारी घिमिरेले दिए ।

सभापति, १ महामन्त्री, १ कोषाध्यक्ष सहित खुला, महिला, प्रदेश र समावेशी सहितको केन्द्रीय सदस्य गरी ६४ पदका लागि निर्वाचन हुनेछ । पदाधिकारीको ३ पदमा १० जना सहित ३ सय १२ जना उम्मेदवार छन् ।

घिमिरेले ति पदहरुमा मतदानका लागि ९ किसिमको मत्रपत्र तयार पारिएको बताए । उनका अनुसार पदाधिकारीमा सभापतिका लागि छुट्टै तथा महामन्त्री र कोषाध्यक्षलाई एउटै मत्र पत्र बनाइएको छ । बाँकी ७ वटा छुट्टा छुट्टै मत पत्र खुला, महिला खुला, आदिवासी जनजाति, मुस्लिम, मधेसी, दलित र प्रदेशबाट छानिने केन्दि्रीय सदस्यका लागि तयार पारिएको छ ।

अपरान्ह ४ बजेसम्म मतदान सक्न सभागृह भित्र १ सय २५ वटा गोप्य मतदान बुथ बनाइएको घिमिरेले जानकारी दिए ।  पार्टीको विधान अनुसार बढीमा ८५ सदस्यीय केन्द्रीय समितिमा १ उपसभापति, १ महामन्त्री र १ सहमहामन्त्रीमा निर्वाचित भएका केन्दि्रीय समिति सदस्य मध्येबाट केन्द्रीय कार्यसमितिले चयन गर्ने प्रावधान छ । महिला, दलित, जनजाति, मधेसी, मुस्लिमबाट १-१ जना सहित २१ केन्द्रीय सदस्य निर्वाचित सभापतिलाई मानोनित गर्ने अधिकार छ ।

मतदान स्थल सभागृहमा तयार गरिएको गोप्य मतदान केन्द्र ।  अंगद ढकाल/कान्तिपुर

सभापति जित्न ५० प्रतिशत बढी मत
पार्टीको विधान अनुसार सभापति पदका लागि निर्वाचित हुनेले ५० प्रतिशतभन्दा एक मत बढी ल्याउनुपर्ने हुन्छ । महामन्त्री सहित अन्य पदका लागि बढी मत ल्याउने उम्मेदवार विजयी हुने छन् ।
आइतबार हुने निर्वाचनमा कुनै उम्मेदवारले त्यती मत नल्याए सभापतिका लागि दोस्रो चरणको निर्वाचन हुनेछ । मतदान सम्पन्न भए लगत्तै आइतबार साँझ सभागृहमा नै सभापतिका लागि खसेको मतको मतगणना गरिने र आवश्यक परे सोमबार बिहानदेखि दोस्रो चरणको निर्वाचनको तयारी गरिएको निर्वाचन समितिका सदस्य घिमिरेले बताए ।

सभापतिका लागि दोस्रो चरणमा हुने निर्वाचनमा बढी मत ल्याउने २ जनाबीच प्रतिस्पर्धा हुने र त्यसमा साधारण बहुमत ल्याउने उम्मेदवार विजयी हुनेछन् ।

अन्य पदको मतगणना सोमबारबाट
सभापतिको परिणाम घोषणापछि मात्रै अन्य पदका लागि मतगणना हुनेछ । त्यतिन्जेल ति मतपेटिका पार्टी कार्यालय सानेपामा रहनेछन् । सभापतिको मतगणना सभागृहमा भएपनि अन्य मतगणना सानेपामा हुने घिमिरेले बताए । सभापति बाहेकको मतगणना राति नगरिने उनले जानकारी दिए ।

मतदान गर्ने स्थल सभागृहमा मत पेटिका तयार गर्दै कर्मचारी ।   अंगद ढकाल/कान्तिपुर
पार्टी कार्यालय सचिव प्रदीप पराजुलीले सभापति पदका लागि पुनः निर्वाचन गर्नुपरे थप एक दिन महाधिवेशन लम्बिने बताए । वरिष्ठ अधिवक्ता राधेश्याम अधिकारीको संयोजकत्वमा गोपालकृष्ण घिमिरे र खमबहादुर खाती सहितको पार्टीले गठन गरेको तीन सदस्यीय केन्द्रीय निर्वाचन समितिले क्षेत्रदेखि केन्द्रसम्मको सम्पू्र्ण निर्वाचन प्रक्रिया सञ्चालन गरेको छ ।